लुम्बिनी प्रदेशके चार उपमहानगर पालिकामध्ये घोराही क्षेत्रफल व मतदाता हिसाबले बरा उपमहानगरपालिका हो । वैशाख ३० गते हुइना स्थानीय तह निर्वाचनम यि उपमहानगरम मेयर पदम १४ जहनके उम्मेद्वारी बा ।
घोराहीम सत्तारूढ गठबन्धनम फुट आइल बा । नेपाली कांग्रेस, नेकपा (माओवादी केन्द्र), जनता समाजवादी पार्टी व राष्ट्रिय जनमोर्चाके गठबन्धन बा । गठबन्धनके घटक दल नेकपा (एकीकृत समाजवादी) भर एक्कले चुनाउम लागल बा । गठबन्धनसे माओवादीके केन्द्रीय सदस्य हेमराज शमाह मेयरके उम्मेदवार बनैल बा । एकीकृत समाजवादीसे केन्द्रीय सदस्य रामप्रसाद चौधरीह उम्मेदवार बनैल बा ।
ओस्टक नेकपा (एमाले) नरुलाल चौधरीह मेयरके उम्मेदवार उठैल बा । घोराहीके निवर्तमान मेयर चौधरी एमाले पोलिटब्यूरो सदस्य तथा दाङका इन्चार्ज हुइट । अस्टक राष्ट्रिय प्रजातन्त्र पार्टी (राप्रपा) से सरिता देवकोटाह उम्मेदवार बनैन बा । देवकोटा कुछ समय आघ कांग्रेसमसे विद्रोख कैख राप्रपा प्रवेश कर्लरलही । ओस्टक रेशम चौधरीके नागरिक उन्मुक्ति पार्टी शान्ता चौधरी व मंगोल नेशनल अर्गनाइजेशनसे कल्पना चौधरीह मेयरके उम्मेदवार बनैल बा ।
यी मध्ये गठबन्धन व एमालेक उम्मेदवारबीच कडा प्रतिस्पर्धा हुइना डेख परल बा । तुलनात्मक रूपले गठबन्धनके उम्मेदवार शर्मा बल्गर मान्गिलसे फे एमालेके उम्मेदवार नरुलाल चौधरी फे कम निहुइट । गठबन्धनक उम्मेदवार शर्माके पुरान गाउँ देउखुरी हो । शान्ति प्रक्रियापाछ घोराही–१५, म बसाइँ सुरु कर्लक हुइट । कांग्रेसके सक्कु भोट अइलसेकेल शर्मा जित्ना अनुमान बा । तर, माओवादीह मेयर डेलक कैख कांग्रेसके नेता तथा कार्यकर्ता रुष्ट बाट । उहाँहुक्र सामाजिक सञ्जाल मार्फत माओवादीह समर्थन कर निसेक्ना कैख विरोध व आक्रोश कर्टि आइल बाट । किउज पार्टी परित्याग समेत कैसेक्ल ।
एमालेके उम्मेदवार चौधरीह गठबन्धनभिट्टरके असन्तुष्टिले फाइदा पुग्ना स्थानयीबासी बाटोइठ । घोराही–१ सुर्केडाँगीके चौधरी साविक रामपुर गाविस अध्यक्ष व घोराही उपमहानगरके मेयर हो स्याकल बाट । वौद्धिक व विकासप्रेमिके रुपम चिन्जैना चौधरी जिल्लाके लोकप्रिय नेता फे हुइट । घोराहीम थारू समुदायके बाक्लो बसोबास बा । उहम अधिकांश मत चौधरीह अइना स्थानीयहुक्र बटोइठ ।
असिन बा गत चुनाउके मत
२०७४ के स्थानीय निर्वाचनम घोराहीके मेयर व उपमेयर सहित १० वडाध्यक्ष एमाले जिटल रह । मेयरम नरुलाल चौधरी २२ हजार ३० मत अन्ल रलह । उहाँक प्रतिस्पर्धी कांग्रेसक उम्मेदवार भूपबहादुर डाँगी १७ हजार ४८४ मत प्राप्त कर्लरलह । डाँगी आब गठबन्धनसे उपमेयरके उम्मेदवार बाट । ओस्टक उह ब्याला माओवादीक जीवन गौतम १२ हजार ८२ मत प्राप्त कैख तेस्रो हुइलरलह । गौतम चुनावके मुखम पार्टी छोर्खा स्वतन्त्र बैसल बाट । गठबन्धनके विरोधम पार्टी छोर्लक उहाँक निकटहुक्र बटोइठ । गत निर्वाचनम कांग्रेस व माओवादीके जम्मा मत २९ हजार ५६६ रह । उ एमाले पैलक मतसे सात हजार ५३६ मत बहुट हो । तर, गठबन्धनक उम्मेदवार शर्मा यिहिसे आघ माओवादी अन्लक सक्कु मत निपैना गौतम निकट एक नेता बटोइल ।
माओवादीह मेयर डेलकम असन्तुष्टि जनैटि कांग्रेस नेतृ सरिता देवकोटा फे राप्रपसे मेयरम उठलक ओर्से गठबन्धनके भोट काटजैना आकलन कैगिल बा । ओत्रकेल निहोख आबके निर्वाचनम लौव मतदाता फे निर्णयक बा । पाछक पाँच वर्षम घोराहीम ३४ हजार ५०० लौव मतदाता थप्गिल बा । आघक् निर्वाचनम ७८ हजार ४२७ मतदाता रलह कलसे आबके एक लाख १२ हजार ९२७ जन मतदाता बाट ।
