दाङक थारू बस्तीम परम्परागत सख्या पैयाँ नाचक रौनक सुरु हुइल बा । डस्या अइना दुइ अठ्वार आघसे डस्या निओराइकसम सामूहिक रूपम गाउँम सख्या पैयाँ नच्ना थारू समुदायम परम्परा रटि आइल बा ।
घोराही उपमहानगरपालिका १७, ओखरा गाउँम सख्या पैयाँ नाच सुरु कैसेक्लक् लक्षिम चौधरी बटोइली । उहाँ यिह कुवाँर १२ ठेसे सख्या पैया नाच् नाच सुरु कर्लक् बटोइली । “डस्याम नच्ना सख्या गीत नम्मा रठा, उहाँकली, बहुट पैढाँरक गीत बा, यी गीत गाइसुरु कलस्ृसे निओराइकसम गैना चलन बा, उहमार हम्र झटह सुरु कैडर्ली ।” थारू बस्तीम करिब एक से बहुट समयसम सख्या पैयाँ नच्ना नाचले गाउँघरम रौनक रठा । दिनभर खेट्वावारीम काम कैख सन्झ्याम मटावाँ वा बडघरके घरके अङ्नम सख्या पैया नच्ना गीत गइना कर्ठ ।
अस्टक घोराही–१७ गुलर्याम फे सख्या पैयाँ नाचका सामा हुइटी रलक उह गाउँके शान्ती चौधरी बटोइली । “आब मन्द्रा सजैना काम हुइटी बा, उहाँ कली, मन्द्रा सजाख सेक्लसे एक दुइदिनम सख्या पैयाँ नाच् नाच सुरु कर्बी ।” सख्या पैयाँ नाच दुई समूह बनाख नच्ना कैजिठा । महिला नाच टोलीके मुख्य अगुवाह ‘मोह्रिन्या’ र ड्वार अगुवाह ‘पछगिन्या’ कैजिठा । विवाहित तथा अविवाहित युवती ‘बठिन्या’हुक्र नाचम सहभागी हुइठ । थारू मौलिक भेषभूषाम सपर्ख हातम मञ्जिरा बजैटी सामूहिक रूपम सख्या गीत गैना कर्ठ । पुरुष ‘मन्ड¥या’हुक्र मन्द्रा बजाइबेर साथ डेना कर्ठ । सख्या गीत सुरुम मोह्रिन्याके समूहस सुरुकर्लसे ड्वासर फ्यारा पछगिन्याके समूहम गैना चलन रलक चौधरी बटोइली ।
ओस्टक जौन समूहम नचन्यन गैठ, उह समुहम मन्ड¥याहुक्र जाख मन्द्रा बजैना कर्ठ । सख्या नाचसंग बीचबीचम मेरमेह्रिक २२ ख्वाटके पैया लगैना कर्ठ । सख्या नाच व गीतके मूल परम्परा एक्क रलसे फे गाउँठाउँअनुसार नच्ना शैलीम कुछ फरक रलक मटावाँ महासंघ दाङक अध्यक्ष चन्द्रप्रसाद चौधरी बटोइल । सख्या गीत गाइबेर राधा व कान्हासे जोर्ख गैना चलन रलक उहाँ बटोइल । उहाँके अन्सार भदौम कर्ना हार्या गुरै पूजाठेसे सख्या नाच नाच खुल्ना व कहोंर कहोंर टबहसे जो सुरु कैख डस्या ओरैलक ड्सावर अठ्वारम नच्ना कर्ठ । “अघपाछ सख्यापैया रातम नच्ठ, उहाँ कल, गाउँले टीका अर्थात् नवमी डिनठेसे बडादसैँसम चर डिन्ख सख्या नच्ना चलन बा ।” मन्द्रा व मञ्जिराके तालम सामूहिक रूपम गैना नच्ना सख्या पैयाँ थारू समुदायके मौलिक सांस्कृतिक परम्परा हो । अडस्याके आगनमसंग सख्या पैयाँ नाचले थारू बस्तीम सांस्कृतिक उत्सव संग सख्यापैया नाचके रौनक बह्रल बा ।
