नेपाल आदिवासी जनजाति पत्रकार महासंघ (फोनिज) से लौव अग्रासन साप्ताहिक ‘फोनिज मातृभाषा पत्रकारिता सम्मान– २०८१’ से सम्मानित हुइल बा । काठमाण्डौ स्थित फोनिजके कार्यालयम फोनिजके २५ औं स्थापना दिवस तथा रजत बर्ष समारोहम अग्रासान साप्ताहिकह सम्मान कैगिलक् हो ।
पत्रिकाके प्रकाशक–सम्पादक सन्तोष दहितह कार्यक्रमके बर्का पहुना संचार तथा सूचना प्रविधि मन्त्री पृथ्बीसुब्बा गुरुङ व फोनिजके केन्द्रीय अध्यक्ष गजुरधन राई संयुक्त रुपम नगद २५ हजार सहित सम्मान पत्र व दोसल्लाले सम्मान कर्ल रलह ।
विगत नम्मा समयसे मातृभाषा पत्रकारिताके माध्यमसे नेपालक आदिवासी जनजाति समुदायके इतिहास, भाषा, संस्कार, संस्कृति रितिरिवाज व परम्परा संरक्षण, प्रवद्धन व अधिकार स्थापित कर्नाम बराभारी योगदान पुगैलक कटि अग्रासन साप्ताहिक सम्मान कैगिलक फोजिनके वरिष्ठ उपाध्यक्ष लक्की चौधरी बटोइल ।
ओस्टक स्थापना दिवसके अवसरम विजय रत्न तुलाधर, पुष्पहरि क्याम्पा राईह ‘फोनिज राष्ट्रिय पत्रकारिता सम्मान –२०८१’ ले सम्मान कैगिल रह । अस्टक सटेन्द्र जबेगु, बिष्णु तामाङ व खिमा गुरुङह ‘फोनिज राष्ट्रिय पुरस्कार –२०८१’ ले पुरस्कृत कैगिल रह ।
नेपाल आदिवासी जनजाति पत्रकार महासंघ (फोनिज)के केन्द्रीय अध्यक्ष गजुरधान राईके अध्यक्षता एवं चार तथा सूचना प्रविधि मन्त्रीके पृथ्बीसुब्बा गुरुङके बर्का पहुनाम कार्यक्रम सम्पन्न हुइल रह । कार्यक्रमम प्रेस काउन्सिल नेपालके अध्यक्ष बालकृष्ण बस्नेत, नेपाल पत्रकार महासंघके अध्यक्ष विपुल पोख्रेल, फोनिज नेपालके निवर्तमान अध्यक्ष एवं सल्लाहाकार डण्ड गरुङ लगायत शुभकामना मन्तव्य व्यक्त कर्लरलह ।
फोनिज नेपाल आपन २५ औं स्थापना दिवस तथा रजत बर्षके अवसरम देशभर मेरमेह्रिक कार्यक्रम कैख भब्य रुपम स्थापना दिवस व रजय बर्ष मनागैलक फोनिजके बरिष्ठ उपाध्यक्ष लक्की चौधरी जनैल । उहाँके अनुसार फोनिज नेपालके ५६ जिल्लाम शाखा विस्तार हुइलक् हुइल बा । ओस्टक विदेशमफे फोनिजक शाखा विस्तार कैगिलक चौधरी लौव अग्रसानह जनैल ।
