दाङक मुख्य दुइ शहरम आब महोत्सव संचालन हुइटी बा । तुलसीपुर उद्योग वाणिज्य संघके आयोजनाम तुलसीपरम व दाङ चेम्बर अफ कर्मशके आयोजनाम घोराहीम महोत्सव संचालन हुइटी आइल बा । यी डुनु महात्सव स्थल भिट्टर व्यवसायिकके लाग मेरमेह्रिक सयौं स्टल ढैगिल बा । यी स्टल मध्य एक्ठो स्टल आब फे भाइरल बनल बा ‘शान्ताको अचार ।’
पुर्वकम्लरी, निवर्तमान प्रतिनीधि सभा सदस्य तथा एमाले पोलिटब्युरो सदस्य समेत रलक् शान्ता चौधरीके उत्पादन कर्लक अचार आब दाङम केल निहोक देशभर चर्चाम बा । महोत्सव अवलोकन करल पुग्लक अधिकांस मनै ‘शान्ताको अचार’ स्टल खोज्टी ग्राहकहुक्र अचार किन पुग्ठ । स्टलम पुग्ख किउ फोटु खिचैठ त किउ अचार किन्ठ । आब उहाँके स्टलम अचार किन्नाहुकनके घुइचो बा ।
‘शान्ताको अचार’ म भेज व ननभेजम अचार मिल्ठा । ‘ननभेजम चिकेन, मटन व मच्छिके अचार पाजैठा, उहाँ कली, भेजम लसुन, अकबरे खुर्सानी, तामा, मोरै, अदुवा, मिक्स व लप्सी लगायत २५ परिकारके अचार पाजैठा ।’ उहाँ गत पुस २० गते घरेलु तथा साना उद्योग कार्यालय दाङम शान्ताको अचार नाउम उद्योग दर्ता कैख व्यवसायिक रुपम अचार उत्पादन कर्टि आइल बाटी । ओसिन त शान्ता विगत ८ महिना आघसे अचार बेच्टी आइल रलही । दाङ व काठमाण्डौसे अचार बेच्टी अइलक् शान्ता गत पुस २० गते औपचारिक रुपम उद्योग दर्ता कराख देशक विभिन्न ठाउँम लग्ना म्याला, महोत्सवम स्टल ढैख अचार बेच्टी अइलक बटोइली ।
आम्हिनसम अचार मजा विक्री हुइटी आइल बा, शान्ता कलि, अचार किन अइना ग्राहकहुक्र असिन भिडम खोज्टी हमाठे अइठ, हम्र खुशी व सन्तुष्ट बाटी ।’ दिनम एक्ठो स्टलमसे २० हजारसे २५ हजारसम्मके अचार विक्रि हुइटी आइल बा । चिकेनके दुइ हजार, मटनके चार हजार, बफ सुकटीके तीन हजार व मच्छिके एक हजार ८ सयम प्रतिकेजिके दरले बेच्टी अइलक शान्ता जनैली । ओस्टक ननभेजम लसुन, अकबरे खुर्सानी, तामा, मुला, अदुवा, मिक्स व लप्सी लगायतके न्यूनत प्रति केजि चार सय ठेसे एक हजार दुइ सयसमके म्वाल पर्ना उहाँ बटोइली ।
करिब २० लाख लगानिम आचार उद्योग संचालनम अन्लक शान्ता आब ९ जहन रोजगार समेत डिहल बाटी । दिनप्रतिदिन आचारके माग बहर्टी गैल बा, उहाँ कलि देश विदेशम समेत अर्डर अइठा, आब अचार बनैना महिन भ्याइनभ्याइ बा । रातीके १२ बजेसम अचार बनैना काम कर्टि अइलक शान्ता सुनैली । राजनीतिम समेत ओत्रह क्रियाशिल रलक शान्ता आयास्रोतक कौना डगर निहुइलकओर्से आपन जिविकोपार्जन कनाम सहज हुइना व गाउँघरक मनै रोजगार समेत पइना हुइलकओर्से अचार उद्योग संचालनम अन्लक उहाँके कहाइ बा ।
