नविन चौधरी
बर्ष दिनिक खेतिपाती किसानहुक्रँ ढेर आशा ओ अभिलाषा लेक बर्खा कर्ठ । दिनरात हात ग्वारा स¥याक कर्लक खेतिपातिमसे हुईना धानले आपन बर्ष दिन्वक जीविकोपार्जन कर्ना, लौव गृष्टि बनैना, ओ उह धानले आपन आर्थिक अवस्था बल्गर बनैना हरेक किसानक योजना रठा । आब घरम बाली भित् त्रैना ब्याला अर्थात् माना बोक मुरी भित्त्रैना ब्याला झरीक कारणले धानबालीम बराभारी क्षती हुईल बा ।
लग्ढार पर्टी रलक झरीले खेत्वम काटल धान पानिम बुरल बा कलसे और खेत्वम ढलल बा । ओस्टक खेत्वम छिटल मर्सी, अर्सी, लाही, गहुँ आदि सक्कु पानिक कारणले क्षती हुईल बा । खेत्वम काटल धान उह पानिम जम्ना अवस्थाम बा कलसे बाल, गुडा सक्कु झरल बा । धान रलक खेत्वम जो पानि बहलक ओ तलैलक ओर्से काटल धान खोल्वाम पुरहल कलसे छिटल रवीपात फे सक्कु पुहल ओ गलल बा । वर्ष डिन्वक खेतिपातिम एक्कासी क्षती पुगाईबेर किसान हुकन ढेर पिडित ओ दुखित बनाईल बा ।
एकहोर कोरोनाक महामारीले अस्टब्यस्ट रहल किसानन्क जीविका झन् पिडादायी बनल बा । माहामारीक कारण गुजारा फे मजासे निचलाई पैलक किसानहुक्रँ आब का खैना? का लगैना? कना दुखम बैठल बाट । भर्खर दस्या ओराक खेतिपातीम भिरल किसानहुँक्र असिन मेरीक घटना हुईबेर खेत्वा हेर्टी आँस खसैटी बाट । घोराही उपमहानगरपालिका वडा नं १६ क सन्तरीया चौधरी कठी–‘बाली घरम भित्त्रैना ब्याला झरीले हमार सक्कु धानम क्षती पुगल बा । और वरष मुरीका मुरी धान घरम भित्त्राई हम्र ट असौंक सक्कु नोक्सान होगील का खैना हो ।’ उह गाउँक सुष्मा चौधरीक फे ओस्ट कहाई बाटिन् ।
देश भर हुईलक झरीले खास कैख लुम्बीनि, सुदुरपश्चिम ओ कर्णाली प्रदेशम ढेर क्षती पुगैलक मौसम तथा भु–विज्ञान विभाग जनैल बा । अधिकाशंसे ढेर किसान थारु समुदायसे बाट । खेतिपातिमसे जो थारुन्हक गुजारा चल्ठा । ढेर जो किसान आम्ही फे खेतिपातीम आश्रीत बाट । “कोरोनाक महामारीक क्षती बेहोर्लक किसानहुकन आब धानबाली भित्त्रैना ब्याला भारीन्हक विपत्ती आईल बा” सन्तोष दहित फेसबुकम लिख्ठ । ओस्टक घोराही वडा नं १७ क केबी चौधरी फेसबुकम लिख्ठ “घरम धान विना भित्त्रैल खेत्वम क्षती होगील, सक्कु निकाय एकफ्यारा स्वाँच पर्ना बा” । ओस्टक बर्दियासे सोम डमनडौरा लिख्ठ “किसानहुकनक लाग यी दर्दनाक पिडा हो । हम्र सक्कु नेपाली विश्व खाद्य अधिकारसे जोरगिल विषय हो । प्रकृतिक गति ओ मनैन्हक विकृतिह हम्र सामना करपर्ठा । उहमार विपदक सामना कर सरकार अैना वर्षक योजनाम सम्बोधन करपर्ठा ओ अख्खनके हुईलक क्षतीपुर्ती किसानहुकन डेहपर्ठा” ।“न मजा कुल्वा हो, नमजा नहर बा । ढेर हुईलक पानिह व्यवस्थापन करपर्ना कौनो तरीका निहो उहमार असिन हुईलक हो । यी त प्रकृतिक दोषसेफे सत्ताम रहल नेता कार्यकर्ता हुकन्क दोष हो । सक्कु बजेट डगरम लगाईबेर ना मजा डगर बनट नाट और विकास हुईट उहओर्से नेपालम सिचाईक मजा व्यवस्थापन हुईपर्ना बा” कन्हैलाल चौधरी फेसबुकम लिख्ठ ।
आपन खुशि ओ सुखी जिन्गीके लाग खेतिपातीम आश्रीत रहल किसानहुक्रँ असिन मेरीक प्राकृतिक विपत्तीक सामना कर्ना लौव बात निहो । हर वरष थरीक थरीक विपत्ति भोग्टी ओ देक्टी आईल बाट । टफे विपदसे बचकलाग सरकार कसिन मेरीक काम कर्टी बा किसान हुकन पटा निहो । उहमार जात्तिक किसानहुकनके समृद्धि चहना हो कलसे सरकारसे हरेक मेरीक समस्या पहिचान कैख किसान हुक्रँ भोग्टी रलक समस्याह सम्बोधन करपर्ठा । डगर बनाईबेर ह्वाए चाहे सिचाईक लाग कुल्वा खानबेर ह्वाय मजा कुल्वा ओ नहरक व्यवस्थापन करपर्ना बा । नैकी सद्दभर अस्ट मेरीक समस्या निहुई कह निसेक्जाई । किसान डुब्लसे देश डुबी कना बातह फे ख्याल करपर्ठा ।
