थारु भाषा, कला, संस्कृतिके संरक्षण व प्रवद्धनके लाग ७ बुंदा दाङ घोषणा पत्र जारी कैगिल बा । प्रेस काउन्सिल नेपालके आयोजनामा सोमारक डिन्वा घोराहीम हुइलक थारु भाषाक पत्रकारिता ओ आचासंहिताक विषयम कचेहरीम थारु, भाषा, साहित्यके संरक्षण व प्रवद्र्धनक लाग थारु भाषामा लेख, रचना, कविता लिख्ना थारु भाषाके पत्रपत्रिका तथा पुस्तक, उपन्यास प्रकाशन व प्रसारण कर्ना सहित ७ वुदां घोषणा पत्र जारी कैगिल हो ।
थारु पत्रकार संघ नेपालके अध्यक्ष सन्तोष दहितके अनुसार घोषणा पत्रम थारु संचार गृहके स्तरवृद्धि तथा निरन्तरताक थारु संचार माध्यह प्रेस काउन्सिल नेपालसे वर्गीकरणम विशेष प्राथामिकता डिह पर्ना व राज्यसे अनुदान, सहुलियत ऋण उपलब्ध करैलसे थारु संचार माध्यह निरन्तरता डेना, प्रेस काउन्सिल नेपालसे जारी पत्रकार आचारसंहिताह थारु भाषाम प्रकाशन कर्लकम थारु पत्रकार संघ नेपालके टरफसे काउन्सिलह धन्यवाद व्यक्त कर्टि याकर प्रभावकारी कार्यान्वयनके लाग थारु पत्रकार प्रतिवद्ध रना, वर्तमान संविधान तथा कानुनसे थारु लगायतक मातृभाषा संरक्षण व विकासक लाग प्रदान कैगिलक् हकअधिकार व अवसरह अधिकतम सदुपयोग कैख थारु भाषा सञ्चार माध्यमम थारु भाषा, साहित्य, कला संस्कृतिके प्रवर्धनका लाग भूमिका खेल्ना उल्लोख कैगिल बा । ओस्टक थारु भाषा सञ्चार माध्यमह निरन्तर हुइ निस्याकल अवस्थाम रलक मेरमेह्रिक सञ्चार माध्यमह पुनः सुचारु कर्ना ओ आगामी दिनम सञ्चार माध्यम सहज रुपम निरन्तर प्रकाशन प्रशारण हुइना वातावरण बनाइलाग सरकारसे आवश्यक पहल करपर्ना माग कर्टि हम्र थारु पत्रकारहुक्र फे यी पक्षम सक्रिय योगदान डेना थारु संचार माध्यमम लोककल्यणकारिणी विज्ञापन थारु भाषाम प्रकाशन व प्रसारणक लाग विज्ञापन बोर्डसे थारु भाषाम विज्ञापन नमुना उपलब्ध कराइपर्ना ध्यानाकर्षण करैटि थारु संचार गृहम थारु भाषाम प्रकाशन व प्रशारण कर्र्ना व दाङके सुन्दर नगरी घोराहीम प्रेस काउन्सिल नेपालसे आयोजित थारु भाषाके पत्रकारिता व आचासंहिता विषयक राष्टिूय गोष्ठीम थारु पत्रकार, घोराही उपमहनगरपालिकाक नगरप्रमुख नरुलाल चौधरी, नेपाल पत्रकार महासंघक केन्द्रीय अध्यक्ष बिपुल पोख्रेल, प्रमुख जिल्ला अधिकारी हिरालाल रेग्मी लगायत सहभागी सक्कु मैगर कबिलाहुकन धन्यवाद व्यक्त कैगिल बा ।
यिहविच नेपालम पहिला फ्यारा थारु भाषक पत्रकारिता आचारसंहिता बनागिल बा । प्रेस काउन्सिल नेपालसे पत्रकारिता आचासंहिताह थारु भाषम अनुवाद कैख थारु भाषक पत्रकारिता आचारसंहिता पोष्टाके विमोचन कैगिल रह । पोष्टाके विमोचन घोराही उपमहानगरपालिकाके नगरप्रमुख नरुलाल चौधरी, प्रेस काउन्सिल नेपालके अध्यक्ष बालकृष्ण बस्नेत, नेपाल पत्रकार महासंघके केन्द्रीय अध्यक्ष बिपुल पोख्रेल, थारु पत्रकार संघ नेपालके केन्द्रिय अध्यक्ष सन्तोष दहित संयुक्तम विमोचन कर्ल रलह । पोष्टाके विमोचन कर्टि घोराही उपमहानगरपालिका प्रमुख नरुलाल चौधरीारु भाषाम लेखपढके अभ्यासह बह्राइ पर्ना बटोइल । उपमहानरपालिकासे थारु भाषाह कामकाजके भाषा बनैलसे फे ब्यवहारम लागु कर्ना कर्रा रलक बटोइल । कार्यक्रमके बर्का पहुना समेत रलक नगरप्रमुख चौधरी थारु भाषाम पाठ्यक्रम तयार पार्ख अइना शैक्षिक सत्रसे ऐच्छिक रूपम पठनपाठनम अन्ना तयारी रलक जनैल । भाषाके संरक्षण व विकासके लाग थारु भाषाक पत्रकारिता कर्ना आवश्यक रलक उहाँके कहाइ रलहन । कार्यक्रमम प्रेस काउन्सिल नेपालक अध्यक्ष बालकृष्ण बस्नेत थारु भाषा, कला, संस्कृतिके संरक्षण संगसंग पत्रकारिता पेशाह स्वच्छ, मर्यादित बनाइलाग भाषिक पत्रकारिता आचासंहिता बनागिलक बटोइल । पत्रकारिता आचारसंहिता थारु नेपाली, नेवारी व मैथली भाषा अनुवाद कैगिलक बटोइटी अध्यक्ष बस्नेत कल, संकटम रलक भाषाके संरक्षण व प्रवद्धन हुइनाम सहयोग पुग्ना विश्वास बा । नेपाल पत्रकार महासंघक केन्द्रीय अध्यक्ष बिपुल पोख्रेल भाषा जोगाइलाग थारु ब्याकरण बनाइ पर्ना बटोइल । थारु भाषक ब्याकरणके अभावले फे थारु भाषा लोप हुइना अवस्थारलक उहाँ बटोइल । नेपालके विविध भाषाके विकाससके लाग पत्रकार महासंघ सक्कु भाषाक सञ्चार माध्यमह सशक्त बनाइ पर्नाम लागि पर्लक फे बटोइल ।
प्र्रेस काउन्सिल नेपालके अध्यक्ष बालकृष्ण बस्नेतके अध्यक्षताम हुइलक कार्यक्रमम प्रमुख जिल्ला अधिकारी हिरालाल रेग्मी, प्रेस चौतारी नेपालके केन्द्रीय उपाध्यक्ष सविन प्रियाशन, थारु पत्रकार संघ नेपालके अध्यक्ष सन्तोष दहित, पत्रकार केपि घिमिरे लगायत बोल्ल रलह । प्रेस काउन्सिल नेपालके सदस्य शरद अधिकारीके स्वागत मन्तव्यसे सुरु हुइलक कार्यक्रमम थारु भाषक डा. कृष्णराज सर्वाहारीे थारु भाषाको पत्रकारिताके अवस्था व चुनौतीक विषयम कार्य पत्र प्रस्तुत कर्लरलह । उहाँके कार्यत्रप उप्पर सहप्रध्यापक कुलविर चौधरी टिप्पणी कर्ल रलह । ओस्टक पत्रकार लक्की चौधरी थारु भाषाके पत्रकारिता विषयक कार्यपत्र प्रस्तुत कर्ल रलह । उहाँके कार्यपत्रके टिप्पणी पत्रकार ठाकुरसिंह थारु कर्ल रलह । कार्यक्रमम ५० से ध्यार थारु पत्रकारहुकनके सहभागिता रह ।
