भाषा शक्ति हो । यिह शक्तिले काम कैजाइठ । यानिकी प्रभावकारी संचारसे गतिशीलता उठट । यी कारणले आत्मविश्वास जागठ । उहमार भाषा औरम विश्वासके कडि हो । भाषक माध्यसे यी जिवन ओ संसारके व्याख्या कैजाइठ । भाषक माध्यमसे सक्कु मेह्रिक ज्ञान, सीप, धारणाके लेनडेन हुइट । भाषक कारणले मनै लग्घ व डुर हुइठ । ज्याहोस व्यक्तिगत या व्यवसायिक सक्कु अवस्थाम भाषा माध्यम बनठ् । त हमार जिवनम याकर कत्राभारी महत्व बटस कना बात हम्र बुझ पर्ठा । उहमार हम्र हमार मातृभाष कहि या आउर राष्ट्रिय अन्तर्राष्ट्रिय भाषा कहि, भाषिक दक्षता हमार ठे हुइ जो पर्ठा । संचार सीपके माध्यसे हम्र प्रगति कर सेक्ठी ।
जहाँसम थारु भाषक सवाल बा, यिहीम हम्र ध्यान डिह पर्ना जरुर बा । तराइ क्षेत्रम बोल्जैना सब्से भारी भाषा हो यी । लुम्बिनी प्रदेशम करिब १५ प्रतिशत मनै थारु भाषा बोलुइया बाट । सुस्ट सुस्ट मनै थारु भाषा ब्वाल छोर्ना करटी बाट । सरकारी तथा गैरसरकारी क्षेत्रम थारु भाषक कारण पाछ पर्ना अवस्था फे आइल बा । देशभिट्टर फे राज्य एक्कठो खस भाषा संस्कृतिह केल प्राथमिक्ता डिहलमार फे याकर प्रभाव अउर मातृभाषाम नकरात्मक डेखपरल बा । यी विषयहं मध्यनगर कैख ध्यार जसिन स्थानिय तहम भाषा संरक्षण ओ विकासके कार्यक्रम लानगैल बा । प्राथमिक तहम फे मातृभाषाम पह्राइ पर्ठा कना भावना संचार हुइल बा । कौनो कौनो पालिकाम त पाठ्यक्रम ओ पाठ्यपुस्तक समे बनागैल बा । थारु भाषम जो लिख्ना पहर्ना ओ बुझ्ना मौका मिलल् बा । ज्याहोस थारु भाषक महत्व उजागर हुइल बा । यिह विषयम लौव अग्रासन साप्ताहिकके अगुवाइम एक्ठो बराभारी ख्याल कार्यक्रम फे कैगिल । यिहम डा. कृष्णराज सर्वहारी थारु भाषक आवक अवस्था विषयम कार्यक्रम सुनैल ओ डा. जर्मन चौधरी टिप्पणी कर्लरलह । यी कार्यक्रमम बोलुइया सक्कुज थारु भाषाहँ बेल्स पर्ना जरुरी बा कैख बटोइल ।
ओस्टक सरकारी कामकाजके भाषाफे प्रभावकारी कार्यान्वयन हुइपर्ठा कल । थारु भाषाके संरक्षण ओ विकासम राज्य स्तरसे ठोस कार्यक्रम निहुइल कैख याकर माग फे कर्ल । भाषिक सवाल, पहिचान ओ सामाजिक न्यायके विषय हुइलमार राज्य गम्भिर हुइ पर्ठा कना धारणा ढैगिल रह । थारु भाषा विकास राज्य ओ समुदाय स्व्यके जिम्मेवारी हो । हम्र एक होख आघ बह्री । पक्क फे थप उपलब्ध हासिल हुइने बा ।
जय गुर्वावा !
