आपन योजना, अप्पनहें बनैना, आपन बिकास अप्पनहें कर्ना, आपन कानुन अप्पनहें बनैना, न्याय निसाफ अप्पनहें डेना, आपन अगह्वा अप्पनहें चुन्ना ओ अप्पनहें स्वसाशित हुइना स्वसाशन बा थारु संस्कृतिम । परापुर्ब कालसे चल्टि अइलक (मटावाँ/बरघर/भलमन्सा प्रथा) प्रथा आम्हनफे जिवन्त बा । जेहीहन स्थान बिशेष अनुसार कैलारी, कञ्चनपुरम भलमन्सा, बाँके बर्दियाम बरघर, दाङम मटावाँ ओ डेउखरम कटकन्डार नाउँले चिन्ह जैठ । मुखाग्ररुपम चल्टि अइलक ई थारु परम्परा थारुनक सामाजिक मुल्य मान्यता ओ बिश्वासम चल्टि आइल बा ।

पृष्ठभुमि
थारु समाज, परम्परागत संस्था (मटावाँ/बरघर/भलमन्सा प्रथा) से संचालन हुइटी आइल बा । थारुन्हँक पुर्खाओं लोक कल्याणकारी काम करकलाग सामुहिक रूपम काम कर बन्ना मेह्रीक संरचना बनैल । जौन संगठन मनैनक जिवनसे ज्वारल हरेक मेह्रीक पारिवारिक, सामाजिक, धार्मिक, शैक्षिक, न्यायिक ओ स्वास्थ्यसम्बन्धि काम कर्टी आइल बा । अलिखित बिधान वा संबिधानक माध्यमसे संचालन हुइना थारु परम्परागत संस्था थारु समाजक जिवन पद्धति बनल बा । चिरकालसे चल्टिअइलक इ प्रथा थारुसमाजहन एकमुठ बनैल रना साँस्कृतिक पहीचान हो । आपन योजना, अप्पनहें बनैना, आपन बिकास अप्पनहें कर्ना, आपन कानुन अप्पनहें बनैना, न्याय निसाफ अप्पनहें डेना, आपन अगह्वा अप्पनहें चुन्ना ओ अप्पनहें स्वसाशित हुइना स्वसाशन बा थारु संस्कृतिम । परापुर्ब कालसे चल्टि अइलक (मटावाँ/बरघर/भलमन्सा प्रथा) प्रथा आम्हनफे जिवन्त बा । जेहीहन स्थान बिशेष अनुसार कैलारी, कञ्चनपुरम भलमन्सा, बाँके बर्दियाम बरघर, दाङम मटावाँ ओ डेउखरम कटकन्डार नाउँले चिन्ह जैठ । मुखाग्ररुपम चल्टि अइलक ई थारु परम्परा थारुनक सामाजिक मुल्य मान्यता ओ बिश्वासम चल्टि आइल बा । इतिहाश साक्षिबा मेह्रमेह्रीक कालखण्डम हुइलक राज्यक भौगोलिक सीमानाक हेरफेर, व्यवस्था परिबर्तन ओ कौनो फे प्राकृतिक बिपदले स्वस्फुर्तरुपम संचालन हुइटीरलक इ थारुपरम्परा निरन्तर चल्टी रहल ।

(मटावाँ/बरघर/भलमन्सा प्रथा) प्रथा कैह्यासे चलल् कना लिखोट नैमिलट । लकीन मानव समाज बिकासक क्रमम जब मनैनम बगाल बनाख बैठना चेत ओ आपन बगालक सुरक्षा कर सेक्ना अगहवा चुन्ना सोंच अइलन टव्वहेंसे इ प्रथाक शुरुवाट हुइलहुइ कना अनुमान लगाए सेकजाइठ । मनै सामाजिकरण हुइना शुरुवाती चरणम आपन छोटीछोटी बगाल बनाख बैठट । जेहीहन कबिला कैजाय । थारु समुदायम उ कबिला शब्डा आम्हन फे बेलस जैटीबा । हम्र आपन लग्घक आत्मिय मनैन कबिला कठी । समाज कुल ओ कबिलाले बनल रहट । कुल कलक एक्क बंशके मनै हुइट कलसे कबिला कलक बंश चलाइक लाग पाछ ज्वारल नाट सम्बन्ध हो । उहोओर्से कबिला थारु समुदायक एकठो मैगर शव्डा हो ओ आत्मिय सम्बन्ध हो । (मटावाँ/बरघर/भलमन्सा प्रथा)बहुट पुरानहो कना बाट थारु लोक साहित्य बर्किमारसे फे ड्याख सेकजाइट । थारु बर्किमारक स्वर्गारोहन पैढारम जब पाँच पाण्डाओं हरीकबिलास जाइकलाग सहट लग्ल ट हँस्नापुरीक मटावाँ हुँकन खीर भाट खवाख बिडाइ कर्लक प्रसंग उल्लेख बा । उ व्यालक बाटम बर्किमारम असीन अख्रा कहल बा । कटहुँन गैलोमोर गवँकी गवलिया, सबहुन ल्यानो डुढ, चउरा । गवँकी मटावाँ पारल हाँक, डुढ चउरा डरल जुटाइ ।। बलीर भिम अरजुन ढनुर्ढर पाँचो पन्डो राज अउटार १ इ अख्राले थारु समुदाय परापुर्ब कालसे जो मटावाँ, भलमन्सा, बरघर प्रथा मन्टी आइलबाट कना डेखैठा । उहोओर्से थारु समुदायक इ परम्परा चिर कालसे चल्टी अइलक हो कना बाटम दुइमत नै हो ।
थारु समुदायम स्थान बिशेष अनुसार कामकाजी अगहोनहँक फरक नाउँ ओ फरक फरक काम रहल बा । मटावाँ/बरघर/भलमन्सा/कटकन्डारः (गाउँक प्रमुख) लिखन्डारः (लिखापह्री कर्ना) चौकीदारः(गाउँम सूचना कर्ना ओ आपत बिपदम सहयोग कर्ना) चिराकीः (गाउँक सझीहा डिउँटा ठन्ह्वाँ मर्वाम पुजा कर्ना ओ गाउँक सझीहा पुजाम सहयोग कर्ना) अगह्वाः (भौतिक बिकासक कामम कामक बाँटफाँट कर्ना अगह्वाइ कर्ना) गुर्वाः (गाउँक सझीहा ढीउटक पुजा कर्ना, गाउँक मनै पशुपरानी ओ बालीनालिक तन्त्र मन्त्र बिधिसे सुरक्षा कर्ना) केसौकाः (तन्त्र मन्त्र बिधिसे गाउँम करजैना धार्मिक अनुष्ठानम गुर्वक सहयोगी होख काम कर्ना) ढकेहरः (तन्त्र मन्त्र बिधिसे गाउँम आइल अनाज ओ मनैनक सुरक्षा कर्ना) । असीक थारु समाजक अगह्वाहुँकनक कामक बाँटफाँट करल रहट । कामकाजीअगहोन्हँक कामक बाँटफाँट, रीटभाँटक लौसारी, गैल बरसक कामक समिक्षा ओ अइना बरसकलाग लौव योजना बनैना काम माघक बखेरीम खोज्नीबोझनी करजाइट ।
आपन गाउँम अप्पनहें स्वशासित रहुइया मटावाँ/बरघर/भलमन्सा हुँक्र राजनीतिक अधिकार भर पाइ निसेक्ल हुइट । प्रचण्ड गर्मी, अउल, बिफर जसीन महामारी, जंगली जिनवार ओ साँप गोजरनसे लरक उकासल भुइयँक मालिक बन नैपैल । कभु टप्पा प्रगन्नक नाउँम, कभु पञ्चायत ओ बहुदलक नाउँम ट कभु लोकतन्त्र ओ गणतन्त्रक नाउँम राज्यहन कर बुझैना कर्टीरल । कभु पहाडीया रज्जोन कर बुझैल ट कभु अंग्रेजहन कर टीर्ल । कभु राणाहुँकनक भर्वा बोक्लट कभु पार्टीक झ्वाला बोक्ल ।बि.सं १८७२ से बाँके बर्दिया, कैलाली, कञ्चनपुर जिल्ला कम्पनी सरकारक अधिनस्थम रह । ४४ बरस पाछ बि.सं १९१६ म अंग्रेज हुँक्र इ चार जिल्ला नेपालहन फीर्ता कर्ल । उहोओर्से यहीहन नयाँ मुलुक कैजाय । उ व्याला कैलाली जिल्लाम ५ टप्पा, रैकवार, परीहार, बोगटान, लीक ओ मुड्ढी मलवारा । यी पाँच टप्पासे हरसाल ९६७४ कम्पनी रुप्या राज्यह कर टीर पर । ओसहेंक हालककञ्चनपुरहन नरहरीपुर (कलकत्ता) फे कैजाय । इहाँ बाइसी, सेलीपहाड, बैतोड, रौतेली, तीलाचौर ओ रैकवार कैख ६ टप्पा रह । इहाँसे ८१४२ रुपक खप्टा रुप्या कर टीर जाय । बाँकेम चार टप्पा रह कारकाँडो, डौनीहर, रझेट ओ उडैन इहाँसे ५४५५७, ओसहेंक भगवानपुर म डुइ टप्पा रह बघौरा ओ भिर इहाँसे १७४५८ खप्टा कम्पनी रुप्या कर बुझा जाय । रेग्मी (बर्ष १३ भोलुम नं २ पेज २३, २४)इहाँ और जाटक मनै बैठ निसेक्ना हुइलमार उ राज्यहन बुझैना सक्कु कर थारुनक उत्पादनमसे जो जाय कनाम दुइमत नै हो । कर उठैना कामफे थारु (चौधरी) ओ (मटावाँ÷बरघर÷भलमन्सा हुँक्र जो करट ।
थारुन्हँक नेन्ढ सक्कु आदिबासीनक समाज चलैना आपन मौलिक संस्था रठा । इ आदिबासीन्हँक पहीचान हो । आदिबासीनक पहीचान करबेर रहपर्ना पाँचठो चिन्हाँ मध्ये आपन मेह्रीक सामाजिक संरचनाफे हुइपर्ना जरुरी रहट । नेपालम थारुन्हँक नेन्ढ नेवार ओ थकालीहुँकन्हँक प्रथाजनित संगठन कृयाशील बाटन । नेवारहुँकन्हँक प्रथाजनित संगठनहन गुथी कठ । नेवारहुँकन्हँक गुठी नेपालक आदिबासीनम सबसे बलगर बा । नेवारन्हँक गुठीक नाउँसे जो नेपालम गुठी संस्थान स्थापना हुइल बा । गुठी संस्थान ऐन २०३३ कर्लक प्रावधान अनुसार नेवारन्हँक गुथी कानुनी मान्यता फे पैल बा । नेवार जातीक परम्परागत संरचनाम १.मूल थकाली (सर्वमान्य अध्यक्ष) २.थकाली समूह (उमेरक्रम अनुसार) ३.नाइके (व्यवस्थापक) ४.कजी (सचिव) ५.बहिदार (कोषाध्यक्ष) ६.हामू (सूचना प्रवाहकर्ता) ७.बहीदार (कोषाध्यक्ष) ८.हामू (सूचना प्रवाहकर्ता ९.जः (नगर, टोलवासीभित्र रहेका सबै जातिविशेष) ।

नेपालक मुस्ताङम बसगीट्या रहल थकाली आदिबासीनक परम्परागत संगठन फे चलायमान बाटन । जेहीहन मुखीया प्रणाली कठ । मुस्ताङम थकालीहुँकनक १३ गाउँम बसगीट्या रलक ओर्से इ संरचनाहन तेह्र मुखिया प्रणाली कैजाइट । तेह्र मुखियासे पास हुइलक मूलबन्देज ओ धर्मपंचायत अन्तर्गत रहख सक्कु आर्थिक, सामाजिक, धार्मिक,सास्ँकतिक ओ राजनीतिक कानून लागु हुइट । मुखीया प्रणालीक संरचना असीन रहट १.मिरमुखिया (प्रणालीक मुख्य मनैयाँ) २. उप–मिरमुखिया (उप प्रमख) ३.तहबिल मुखिया (आथिर्क कारोबार कर्ना) ४.दश गाउँक दश मुखियाहुँक्र) इ मुखियाहुँक्र बाहेक तेह्र (मुखियक सहायक) रठ । आपन क्षेत्रम भेडी चरन, डाँफे चरन ओ माछी चरणसे हुँक्र कर समेत उठैना कर्ठ ।

२. थारु प्रथाजनित संगठन मटावाँ, बरघर, भलमन्साक महत्व

२.१ थारुन एक्क मालाम जोर्ना संस्कृती
थारु धर्म अनुसार प्रत्येक थारु गाउँम सझीहा डीउँटा भुइह्यार रठ । जौन डिउँटा मटावाँ, बरघर, भलमन्सक नाउँम रठ । गाउँक डीउँटा ओ मटावाँ बरघर भलमन्सक सम्बन्ध एक्कम ज्वारल बा । उहोओर्से मटावाँ, बरघर, भलमन्साहन फे एकठो डीउँटक रुप मानख ठन्होंम वाकर नाउँम मुरा गर्ना चलन बा । ओसहेंक थारुनक हरेक धार्मिक अनुष्ठानम गाउँक नाउँकसंग मुरा मटावाँ, बरघर वा भलमन्सक नाउँलेख पुजा करजाइट । भुइह्याँर अथवा भुइयँक रक्षा करुइया डीउँटा । भुइह्याँर गाउँक जिउधन, बालीनाली, पश परानहुँकन सुरक्षा कर्ठ कना बिश्वास बा । उहो ओर्से खेटी सेक्लसे बालीनालीक सुरक्षक लाग हरीया गुरै÷हरेह्री कर्ना, बाली फर्लसे वाकर सुरक्षकलाग लवांङगी पुज्ना, गर्मीक समय अइलसे जीउ जहान पशुपरानिनक रक्षक लाग ढुरीया गुरै कर्ना चलन बा । इहे धार्मिक बिश्वास ओ सँस्कृतिले थारु समाजहन एक्क मालाम जोर्ल बा । भलमन्सा संरचना थारुन्हँक जिवनसेफे ज्वारल प्रथा हो । मिलजुलख काम कर्ना ओ बाँटखोंटख खैना थारु संस्कृती हो । श्रमक सम्मान कर्ना थारु बिश्वास हो । उहोओर्से भोज बिबाह, मर्नीकर्नी, टइटीहार मन्ना से लेख गाउँक डगर घट्वा बनैना ओ खेटीकिसानीक काम (कुलापानी) समेत थारुहुँक्र मिल्ख कर्ठ । इहे संस्कृति ओ संस्कार थारु पहीचान बनल बा । थारुन एक्क मालाम जोर्ल बा । उहोओर्से भुइह्याँर ओ भलमन्सा संरचना निरहल थारु गाउँ लुगा बिनाक मनैयाँ अस रहट ।

२.२ समाबेशी सहभागिता, सर्बसम्मत निर्णय
थारु गाउँम हुइना हरेक बखेरी, जुट्याल्हा, किस्नाही, कचेहरीम सक्कुजन बोल्ना बराबर अधिकार रहट । बखेरीक व्याला सक्कुजन स्वतन्त्र रठ कना मान्यता बा । उ व्याला व्वालल् बाटहन किउ फे पुर्बाग्रही हीसाबले नैलेट । व्यापक छलफल होख हुइल निर्णयहन बरस बिना पुग्ल बिच्चम उठैना चलन नै हो । ओक्रक बिषयम एकठो कहावट बा “जब मुरीम पानी परी टब बटोइम” । काकरकी घरक ह्वाय चाहे गाउँक योजना सक्कु माघक लहान पाछकेल उठाजाइट । गाउँमक सझीहा बिषयम निर्णय करबेर स्याकल सम सर्बसम्मत कर्ना थारु चलन बा । सझीहा काम जस्टहें धार्मिक साँस्कृतिक, परपुजैह्या, जोग पर्ब, भौतिक बिकास निर्माण वा सामाजिक न्याय निरुपण कर्ना कामम सक्कुन्हँक समाबेशी सहभागिता रहठ । गाउँक बखेरी (बार्षिक ग्राम सभा) म प्रत्येक घरक एकजन अनिबार्य उपस्थित हुइपर्ना व्यवस्था समाबेशी सहभातिाक बलगर नमूना हो । जौन व्यवस्था अनुसार सक्कु चिजम समान सहभागिता रहट । लकिन यहीहन समय अनुसार कुछ सुधार करपर्ना डेख परट । जस्टहें समाजम कीउ धनीबाट कलसे, कीउ गरीब । कीउ ढीउर आम्दानी करुइया बाट कलसे कीउ कम आम्दानी करुइइया बा । केक्रो परिवार छोट बा कलसे केक्रो बरा । असीन अवस्थाम सक्कुजहन बराबर हीसाबले जनश्रम कराइबेर आर्थिक हीसाबले वा मानबिय हीसाबले कमजोर मनैन मर्का परजाइट । उहोओर्से लोक कल्याणकारी राज्य व्यवस्थाक अवधारण अनुसार गाउँम आर्थिक वा मानबिय हीसाबले कमजोर रहल मनैन कम श्रमदान करैना ओ टीहाइ वा मिलौनी उठाइबेर कम लेना व्यवस्था मिलाइ पर्ना जरुरी बा । ओसहेंक जुग ओ समय अनुसार युवा ओ महीलाहुँकनफे सहभागी कराइ सेकजैलसे लौव पुस्ताम पुस्तान्तरण हुइना ओ याकर महत्व आकुर बहरने रह ।

२.३ पारदर्शि ओ जबाफदेही नेतृत्व
थारु समुदायम जबाफदेही नेतृत्व ओ पारदर्शी शासन व्यवस्था बा । ढीउर मनैन्हँक चीट बुझाइ सेक्ना, सुखडुखम साथ डीहे सेक्ना, गाउँक मनै मन पराइल मनैयाँ अगह्वा छानजैठ । गाउँक मनै माना मुठ्या उठाक टीहाइ डेना, श्रम डेना ओ मान सम्मान कर्नाओर्से अगह्वा हुँक्र जन्ता प्रति जबाफदेही रठ । गाउँ डेलक जिम्मेवारी पुरा निकर्लसे लाज मन्ना संस्कृती बा थारुनम । न्याय निसाफ करबेर केक्रोफे मोलाहीजा निमानख तटस्थ होख निर्णय करजाइट । डीहेल जिम्मेवारी अनुसार बरस भरीम कौन अगह्वा कसीन काम करल कना मुल्यांङकन हुइट । डाँर, खारा, मर मिलौनीमसे आम्दानी कट्रा आइल, परपुजैह्या ओ और खर्च कट्रा हुइल कना बाटक सार्बजनिक सुनुवाइ हुइट । गैल बरसक बखेरी÷खोज्नीबुझ्नी÷भुराखेल बनाइल योजना कार्यान्वयन हुइलकी निहुइल, रीटभाँट लागु हुइल निहुइल व्यापक रुपम छलफल होख रीटभाँट लौसारी फे हुइठ । गाउँक भुराखेल÷बखेरी÷खोज्नी बोझ्नी÷माघीडेवानी अगहोन जबाफदेही ओ हरहीसाबहन पारदर्शी बनैल रठा ।

२.४ आवधिक निर्बाचन
प्रजातान्त्रिक पद्धतीम आवधिक निर्बाचन अनिबार्य रहट । इ बाटम थारु समुदायक संस्कृती अग्रगामी बा । प्रत्येक बरस हुइना खोज्नी बोझ्नीसे अगहवाहुँक्र छानजैठ या चुनजैठ । पुरान चिट बुझ्ल रलसे पुरान लौसारी कर्ना नैट लौव अगहवा छान जैठ । प्रत्येक बरस छान पैना हुइल ओर्से नैमजा काम कर्टीकी और अगह्वा छान पैना बिकल्प रहट । एक बर्षे अवधी रनाओर्से एक बर्षक लागटहो कैख पैल्ह भलमन्सा बनक मन निकर्लक मनै फे पाछ मजासे काम कर लग्ठ । काकरकी अइना बर्षक खोज्नीबोझ्नी म जो हुँकन जबाफ डीहे पर्ना रठन । ओसहेंक नेतृत्व चुन्ना प्रकृया पारदर्शी ओ स्याकलसम सर्बसम्मत हुइना ओ नैहुइलसे केल चुनाव करैना ओर्से यी पद्धती प्रजातान्त्रिक बा ।

२.५ बिकासम अपनत्व
आपन गाउँक योजना अप्पनहें बनैना, योजना निर्माण फे अप्पनहें कर्ना हुइलक ओर्से योजनामन अपनत्व रहट । आपन योजना हुइलक ओर्से जनश्रम जुटैना लिरौसी हुइट । निशुल्क रुपम काम करबेर फे मनै जाँङगर लगाख काम कर्ठ । बजेट खर्च पारदर्शी तरीकाले हुइठा । कम बजेटम ढीउर काम ओ काम गुणस्तरीय हुइट । उहोओर्से थारु गाउँम बनल भौतिक बिकास निर्माण नम्मा समयसम टीकठ । आपन करल काम हेर्ख गाउँक मनै खुशी हुइठ ।

३. समस्या ओ समाधानक उपाय
३.१ थारु प्रथाजनित संगठनक बिषयम बुझाइम अस्पस्टता : थारु प्रथाजनित संगठनक माध्यमसे समाजम एकता, कम लागतम ढीउर काम, योजनाम अपनत्व ओ बिकास दिगो हुइटी आइल बा । तर इ प्रथाहन आकुर बलगर कसीक बनाइ सेकजाइ कना बिषयम बृहत छलफल चलाइ पर्ना जरुरी बा । थारु अप्पनहें फे द्धन्दात्मक हीसाबले बिश्लेषण कर्ना ओ और समुदायहन फे याकर महत्व बुझाइ पर्ना जरुरी बा । उहो ओर्से याकर बिषयम सरकारी, गैरसरकारी ओ थारु गैर थारुहुँकन बिचम बहस चलाइ पर्ना जरुरी बा । थारु समुदायक मनै इ परम्परा थारुन्हँक केल हो कना ओ और समुदायक मनै फे इ थारुन्क केल हो कना बुझाइले थारुन्हँक इ प्रथा कमजोर हुइटी गैल बा । समय ओ ठाउँ अनुसार इ प्रथाहन सझीहा नैबनैना हो कलसे निव्वबर ओ डुव्वर हुइटी जैना पक्का बा । उहोओर्से थारु प्रथाजनित संगठनम औरजहन फे सहभागी बनाइक लाग थारु अगह्वाहुँक्र चाक्किर मन बनाइ पर्ना जरुरी बा ।

३.२ थारु अघवन्हँक बहरटीगैलक निरासा ओ घटटीगैलक आत्मबल ः थारु अगह्वाहुँक्र डीन प्रतिदिन निराश हुइटी गैल बाट । आजकाल गाउँम बरघरीया बनक मन कीउ निकर्ट । उहोमार ढीउर गाउँम संस्कृती बचाइक लाग गोटी डारक बलजव्रि एक बरसक लाग बरघरीया बनाजाइट । थारु समुदायक लाग इ जसीन लाज लग्टीक बाट और का हुइसेकी । लकिन असीन काजे हुइटा कना बिषयम समाजम गहींरसे छलफल नै करजाइट । युवा पुस्ता ट झन इ बिषयम नकारात्मक बन्टी गैल बा । पैल्ह पैल्ह गाउँक मटावाँ÷बरघर÷भलमन्सा हन श्रम डेना चलन रह । पाछ बेगारीक सटाहा टीहाइ उठैना चलन आइल । पाछ टीहाइ डेना चलन फे हेराइल । असीक आपन घरक कामक हर्जा कर पर्ना ओ गाउँसे कुछु फे नै पैना ओर्से गाउँक मटावाँ÷बरघर÷भलमन्सा हुइक मन किउ नैकर्ट । हुइना ट बरसक पाँच, डस किलो धान या बर्षक एक डुइ डिन श्रम थारु परिवारक लाग खास बरा बाट नै हो । उहोओर्से आपन समाज बनाइक लाग ओ आपन पहीचान जोगाइक लाग अगहोन प्रोत्साहन डीहे पर्ना जरुरी बा ।
३.३कानुनी बाधा ः संबिधानक धारा ५६.(५) संघीय कानून अन्सार सामाजिक सांस्कृतिक संरक्षण वा आर्थिक विकासक लाग विशेष, संरक्षित वा स्वायत्त क्षेत्र कायम करसेकजाइ कना उल्लेख बा । ओसहेंक स्थानीय सरकार संचालन ऐनक दफा ९९. विशेष, संरक्षित वा स्वायत्त क्षेत्र कायम कर सेक्ना ः (१) नेपाल सरकार सामाजिक, सांस्कृतिक संरक्षण वा आर्थिक विकासक लाग प्रदेश सरकारक परामर्शम देहायक कौनो क्षेत्रहन नेपाल राजपत्रम सूचना प्रकाशन कैख विशेष, संरक्षित वा स्वायत्त क्षेत्र कायम कर सेक्ने बा ः– लकिन उप्पर लिखल कानुनक इ धारा ओ दफा कार्यान्वयन करक लाग सरकार कौनो फे कदम आम्हनसम नै चल्ल हो । उहोओर्से संबिधानक कौन धारा उपधारा वा कौन ऐनक कौन दफा उपदफाहन टेकख थारु प्रथाजनित संगठनक लाग कानुन बनैना कना बिषयम थारु बाहुल्यता रहल स्थानीय सरकारहुँक्र फे अन्यौलम बाट । इहे बाटह मध्येनजर कर्टी बर्दियाक बारबर्दिया नगरपालिका थारु प्रथाजनित संगठन बरघर प्रथाहन कानूनी मान्यता डेसेक्ल बा । नेपालक संविधानक धारा २२१, धारा २२६ ओ अनुसूची ८ क १२ ओ २२, स्थानीय सरकार संचालन ऐन २०७४ क दफा ११ (फ) (४) (५) दफा ११ (४) क (ठ) ओ दफा १०२ बमोजिमक अधिकार प्रयोग कैख बारबर्दिया नगरपालिकाको बरघर प्रणाली संरक्षण, सम्बद्र्धन र बिकास गर्न बनेको ऐन २०७७ जारी कर्ल बा । इ ऐनहन और स्थानीय पालिका हुँकन फे पास कराइक लाग पहल कर पर्ना जरुरी बा ।
३.४ राजनितिक उदाशीनता ः राजनितिक पार्टीहुँक्र थारु प्रथाजनित संगठन प्रति सकारात्मक व्यवहार नैडेखैल हुइट । संबिधानक धारा ४२. सामाजिक न्यायक हक ः (१) आर्थिक, सामाजिक वा शैक्षिक दृष्टिले पाछ परल महिला, दलित, आदिवासी, आदिवासी जनजाति, मधेशी, थारू, मुस्लिम, पिछडा वर्ग, अल्पसंख्यक, सीमान्तीकृत, अपांगता हुइलक व्यक्ति, लैंगिक तथा यौनिक अल्पसंख्यक, किसान, श्रमिक, उत्पीडित वा पाछपरल क्षेत्रक नागरिक तथा आर्थिकरूपले विपन्न खस आर्यहन समानुपातिक समावेशी सिद्धान्तक आधारम राज्यक निकायम सहभागिताक हक हुइने बा ।लकिन संबिधान बन्लक पाँच बरस बिटस्याकबेर सरकार भक्खर इहे अधिबेशनम संघीय निजामती सेवाको गठन, संचालन र सेवाका सर्त सम्बन्धमा व्यवस्था गर्न बनेको बिधेयक प्रतिनिधि सभाम पेश कर्ल बा । जातीय जनसंख्याक आधारम समानुपातिक सहभागिता करैना कानुन निबन्लक ओर्से थारुहुँक्र समानुपातिक समाबेशी कोटा पाइ निसेक्ल हुइट ।

४. हमार आघक डगर
४.१ आपन, आपन गाउँम स्वशासनक अभ्यास शुरु कर्ना
व्यवस्थित रुपम राज्य संचालन करकलाग देशक बिधान बनल रठा । बिधान अनुसार राज्यक संरचना बन्ठा ओ उहो संरचना अनुरुप देशक नागरिकहुँक साशीत हुइठ । राज्यक संबिधान बनअस थारु गाउँम प्रत्येक बरस मौखीक रुपम रीटभाट बनठ । गाउँक मनैन लागु कर्ना कर्रा पर्ना रीटभाँट लौसारी फे हुइट । बर्षभरीक लाग योजना बनट । नेतृत्व चयन हुइठ । सामाजिक न्याय ओ डाँर खारक व्यवस्था हुइट । असीख निजन्ना मेह्रसे एकठो राज्य कर पर्ना सक्कु अभ्यास थारु गाउँम हुइटी आइल बा । लकिन इ अभ्यासहन थारुहहुँक्र अप्पनहें महसुस कर निसेक्ल हुइट । नाट यही राज्य डेख्ल हो नाट कौनो गैरसरकारी संस्था हुँक्र । उहो ओर्से यहीहन व्यवस्थित बनाइक लाग युग ओ समय सुहैना मेह्रसे स्वशासनक अभ्यास शुरु कर्ना जरुरी बा । वाकरलाग टर लिखल काम कर्ना जरुरी बा ।
क) मौखीक रुपम रहल रीटभाँट, न्याय निसाफ, बिकास निर्माण हन गाउँक बिधान, बार्षिक निति कार्यक्रम योजना बजेट बनाख लागु कर्ना ।
ख) गाउँम काम कर्ना सक्कु सरोकारवालाहुँकन बखेरीम अनिबार्य उपस्थित करैना, हुँकन्हँक कामक समिक्षा बखेरीम कर्ना, लौव योजना बनैना ।
ग) संस्कृती ओ बिकृतीक बिषयम व्यापक बहस चलैटी राजनैतिक, शैक्षिक, आर्थिक बिकासक अभियानम लग्ना ।
घ) स्थानीय सरकारम पालिका ओ गाउँस्तरक बरघर संगठनहन सूचीकृत कर्ना ।
ग) बिकृती बिरुद्ध जनजागरण अभियान संचालन कर्ना ।

४.२ बरघर संगठनहन कानुनी मान्यता डिहेकलाग वकालत कर्ना
स्थानीय सरकार संचालन ऐन २०७४ अनुसार स्थानीय पालिकाक गाउँ टोलम बिकास करकलाग टोल बिकास संस्था दर्ता कर्ना अधिकार डेल बा । उहो अधिकार बमोजिम स्थानीय पालिकाहुँक्र टोल बिकास संस्था दर्ता कर्ना ओ उहो संस्था मार्फत योजना बनैना ओ कार्यान्वयन कर्ना काम कर्टी बाट । भलमन्सा बरघर काम कर्टीरहल ठाउँम टोल बिकास संस्था दर्ता करैना हो कलसे सबसे पैल्ह भलमन्सा बरघरहुँकन्हँक अस्तित्व नैरही । डोस्र थारुनक पहीचान मेटजाइ । इ संस्था संस्कृतिसे ज्वार नैरना ओर्से थारुहुँक्र और जाटीनसे प्रस्तीस्पर्धा कर नैसेकहीं । इहे बाटह मध्येनजर कर्टी बर्दियाक बारबर्दिया नगरपालिका थारु प्रथाजनित संगठन बरघर प्रथाहन कानूनी मान्यता डेसेक्ल बा ।इ अभियानहन आब थारु रहल सक्कु पालिकाम चलाइ पर्ना जरुरी बा । ज्याकरलाग सबसे पैल्ह सक्कु पालिकाम पालिका स्तरिय बरघर संगठन गठन करपर्ने बा । जहाँ जसीक सेकजैना अवस्था बा उहाँ ओसहेंक हालीसे हाली पास करैना ओर लग्ना । तर जहाँ तत्कालक लागु करसेकजैना अवस्था नैहो कलसे उहाँ पालिका स्तरक बरघर संगठनक बिधान बनाख पालिकाम सूचीकृत करैना ओ उहो संगठनक अगह्वाइम ऐन पास कराइक लाग पहल कर्टी रना जरुरी बा । तत्कालकलाग स्थानीय सरकारसे मिल्ख बिकृती बिरुद्ध जनजागरण अभियानहन आघ बह्रैलसे मजा हुइने बा । बरघर संस्था पालिकाम सूचीकृत हुइकलसे पालिका स्तरक बजेट परिचालन कर्ना लिरौसी कराइ सेकजाइ ।

५. गोंरी मेह्राइ
भलमन्सा/बरघर/मटावाँ प्रथा थारुनक सबसे भारी पहीचान हो । थारुन एक्क मालाम जोर्लरना संगठन हो । स्थानीय लोकतन्त्रहन बलगर बनैना ओ बिकासम अपनत्व जगैना माध्यम हो । याकर माध्यमसे गाउँ गाउँम सचेतना फैलैना, भौतिक बिकास निर्माण कर्ना, आर्थिक आयआर्जन कर्ना ओ स्थानीय लोकतन्त्रहन बलगर बनैना काम करसेक्ना प्रसस्त संभावना बा । यी बाटहन स्थानीय तह मनन् करपर्ना जरुरी बा । थारु प्रथाजनित अगह्वाहुँक्र साँस्कृतिक हीसाबले ट खुशी बाट तर राजनितिक अधिकारले हुँक्र हेलाहा बाट । जट्रा काम कर्लसेफे गुन जस निपैना ओर्से हुँक्र निरास बाट । निरासा ओ दीक्दारीम सृजना फूल नैस्याकट । उहो ओर्से थारु प्रथाजनित संगठनहन कानूनी मान्यता डेलसे थारुनक पहीचान जोग्नक संग स्थानीय स्तरम समाबेशी सहभागिता, पारदर्शी काम, जबाफदेही नेतृत्व ओ बिकास दिगो शुरु हुइने बा ।

यी कार्यपत्र थारु पत्रकार संघ नेपालसे आयोजित बरघर प्रणाली सम्वन्धि वृहत कार्यक्रमम प्रस्तुत कैगिल रह ।