दाङ, १८ भदौ । नेपाली कांग्रेस दाङले एउटै परिवारका तीन भाइलाई फरक फरक क्षेत्रबाट प्रतिनिधि सभा र प्रदेश सभा सदस्यको लागि नाम सिफारिस गरेको छ ।
दाङ क्षेत्र नम्बर १ बाट कृष्णकिशोर घिमिरे, क्षेत्र नम्बर २ बाट किरणकिशोर घिमिरे र क्षेत्र नम्बर २ को क बाट प्रदेश सभा सदस्यको लागि कमलकिशोर घिमिरेलाई सिफारिस गरेको छ । कृष्ण, किरण र कमल साक्कै तीन भाइ हुन । कृष्णकिशोर घिमिरे २०५६ मा क्षेत्र नम्बर ३ बाट निर्वाचित भएका थिए । उनी अहिले १४ महाधिवेशनबाट केन्द्रीय सदस्यमा निर्वाचित भएका थिए । यसैगरी किरणकिशोर घिमिरे र कमल किशोर जिल्लाका लोक प्रिय नेताको रुपमा चिनिन्छन् ।
यसैगरी दाङको तीन क्षेत्रबाट प्रतिनिधि सभा सदस्यका लागि १४ जनाको नाम सिफारिस भएको काँग्रेस दाङका सभापति शंकर डाँगीले जानकारी दिए । दाङ क्षेत्र नम्बर १ बाट पूर्व सांसदसमेत योगेन्द्र चौधरी, अनुराग खड्का, कृष्णकिशोर घिमिरे र प्रदीप थापाको नाम सिफारिस गरिएको छ ।
यसैगरी दाङ क्षेत्र नम्बर २ बाट पूर्व सांसद राजु खनाल, किरणकिशोर घिमिरे, जिल्लाका पुर्व सभापति घनश्याम रेग्मी र भरतबहादुर न्यौपानेलाई सिफारिस गरेको छ ।
त्यसैगरी दाङ क्षेत्र नम्बर ३ पुर्व सांसद दीपक गिरी, कमानसिंह डाँगी, यमप्रसाद पाण्डे, बिजुल विश्वकर्मा, मदन रसिब र राजेन्द्र धितालको नाम सिफारिस भएको छ ।
