सब्से पहिला अप्न मैगर बधाई बा ।
धन्यवाद बा । सक्कु मैगर नगरबासी, मतदाता व म्वार कबिलाहुकनम सैगर अभार व्यक्त करटु ।
ड्वासर कार्याकालके लाग मेयरम निर्वाचिट हुइल बाटी । आब अप्नह कसिन अनुमुति हुइटी बा ?
हो, मै एक कार्यकाल ओराख आब फेसे ड्वासर कार्यकालके लाग घोराही उपमहानगरपालिकाके मेयरके जिम्मावरी पाइल बाटु । देश संघियताम आस्याकलपाछ पहिला स्थानीय तहके कामके जिम्मेवारी व नेतृत्व कर पैनु । आम मैगर नगरबासी मतदाताहुक्र मत डेख निर्वाचित करैल । आब फेसे ड्वासर कार्यकालक लाग महिन पार्टी व म्वार इच्छाह आम मैगर मतदाताहुक्र अनुमोदन कैख नेतृत्व कर्ना अवसर डेल बाट । यि म्वार लाग शौभाग्यके बात हो । नगरबासीके सेवा कर्ना अवसरह मै जिम्मेवारीके रुपम लिहल बाटु व उत्साहित बाटु । नागरिकहुकनके विश्वासह आब अधिकार, बिकास, संबृद्धी व रोजगारीम जोर्ना योजना बा । वितल ५ बर्षके कार्यकालमा बहुट नमूना योग्य कामहरु कैस्याल बाटी । बाँकी कामह पुर्णता डेना व लौव कामके थालन कैख आघ बहर्ना योजना सहित हमार टिम आघ बह्रल बा ।
चुनाउके ब्याला फे बाँकी कामह पुर्णता डिहकलाग म्वार उम्मेदवारी हो कैख कहल रलही । आब फे उह बात डोह्रैली । आब त निर्वाचित होख फे आइलबाटी । आब उ बाँकी काम केह्यासम पूर्णता पाइत ?
पक्क फे पाँच वर्षके विचम हम्र कर कामके बारेमा जनतनके आघ छर्लङग बा । बहुट काम सम्पन्न हो स्याकल बा । कुछ महत्वपूर्ण कामह पूर्णता डिह पर्ना बा । उह कामह पूर्णता डिहकलाग हमार कामके मुल्यांकन कैख फेसे म्वार टिमह मतदाताहुक्र चुन्ल बाट । शहरसे गाउँ जोड्ना सडक पूर्वाधारह थप बिस्तार व बल्गर बनैया काम बाँकी बा । यी कामह पूणता डेटि रोजगारी सृेजनाक लाग सिपका व्यवस्था कर्ना योजना बा । ओस्टक शिक्षा, स्वास्थ्यमा उल्लेख्य सुधार कैख नगरबासीसे करल आस, विश्वास, भरोसाह टुट निडेना गरी थप घोराही नगरके नागरिक हुइटी कना महसुस व उत्साहित बनैनाम काम हुइने बा ।
घोराही उपमहानगरह कसिन बनैना सोच बनैल बाटी ?
घोराहीह आब चौतर्फि विकाससे जोर्ख सबृद्ध घोराही बनाजिने बा । घोराही उपमहानगर बहुट पर्यायबाची चिनारीसे जोर्जिने बा । पूर्वाधार, आर्थिक, सामाजिक क्षेत्रके बिकासह थप फराकिलो ढंगले आघ बह्राजिने बा । परिर्वतनके मार्गम विकास हुइने बा । सुग्घर घोराही, शिक्षित घोराही, व्यवस्थि घोराही, उद्यमशिल घोराही, सक्कु हिसावले स्र्माट सिटी घोराही हुइने बा ।
घोराहीकेल निहोख दाङके विकासके लाग झटसे झट यिहाँ बिमान स्थल आबस्यक बा । और बात औद्योगिक क्षेत्रके स्थापना कैख रोजगारी व उत्पादनम दाङह देशभर चिनैनागरि योजना बनाख कार्यान्वयनम अन्ना आवश्यक बा । यि सक्कु विषयम हम्र सरोकारवालाहुकनसे बैस्ख छलफल व परामर्श कैख आघ बहर्ने बाटी ।
स्मार्ट सिटीके बात आइल । अप्नक चुनावी घोषणा पत्रम फे घोराही स्मार्ट सिटी बनैना संकल्प कैगिल बा । का पाँच वर्षम यी सम्भब बा त ?
मजा बात उठैली । म्वार हिसावले यी सम्भब बा । वाकरलाग पहिला जिम्मेवारी हम्र सक्कु नगरबासीके फे हो । जबसम्म हम्र अपन्हे स्मार्ट बन निसेक्बी तब और क्षेत्र फे स्मार्ट नि बनी । उहमार पहिला हम्र आपन आनीबानी, बोलि बचन, व्यवहारह स्मार्ट बनाइ पर्ना बा । ड्वासर बाट घोराहीके विकास, स्मार्ट घोराही अर्थात सुग्घर नगर बनैना घोराही उपमहनगरको जत्रा दायित्व बा ओत्रह नगरबासीके फे बा । हमारओर्से सेवा सुविवधाह व्यवस्थित बनैना, सफासुग्घर बनैना, शहरह व्यवस्थि बनैना, उद्योग कलकारखाना, पसलह व्यस्थित ढंगले चलाइलगा सहयोग, समन्वयम हमार सड्ड सहयोग व साथ रही । असिख यिहाँके नागरिक व स्थानीय सरकारके भूमिकासे मेल खैटि गैलसे पाँच वर्षम घोराही स्मार्ट नगर, स्मार्ट सिटी बनाइ सेक्जैना आधार बा । असिन सकारात्मक सोच व डगरम नेङलसे आघ बह्रसेक्ना बहुट सम्भावना बा ।
किसानहुकन खाद्यन्न उत्पादनम वृद्धि व उत्पादित खाद्ययन्न बस्तुके बजारीकरण कर्ना योजना कसिन बा ।
किसानकेल नाही घोराही नागरिकहुकन सिप व रोजगार युक्त बनाइलाग तालिम केन्द्रके स्थापना कैख आर्थिक उत्पादन नागरिकहुकन जोर्ना लक्ष्य बा । बदलिदो समयम कृषि, पशुपालन, अन्य उद्यमह कसिख आधुनिकीकरण व व्यवस्थित बनाइ सेक्जौठा कना सोच, योजन बनैल बाटी । तालिम केन्द्र मार्फत आबस्यकता व इच्छाम आधारित योजना आघ बह्राक युवाहुकन तालिम डेना लक्ष्य बनैल बाटी
असिख खाद्यान्न उत्पादनम बृद्धि कैख किसान व युवाहुकन रोजगारी सृजना कर्ना, उद्यम सञ्चालनम सहयोग कर्ना, जथाभावी प्लटिङह रोक्ना काम त हमार पहिलाके कार्यकालमसे फे हुइटि आइल बा । यि विषयम आम्हिन अग्रसरहोख आघ बहर्ने बाटी । कृषि विना आर्थिक विकास सम्भब नि हो । उहमार हम्र कृषह पहिला प्राथमिक्ता डिहल बाटी ।
अन्तम कुछु कहपर्ना बा की ?
सब्से पलिहा त फेसे घोराही उपमहानगरके नेतृत्व कर्ना अवसर डेलकम मैगर नगरबासी, मतदाता, कबिलाहुकनम हार्दिक हभार व्यक्त करटु । अप्नहुकनके आशा, विश्वासह टुट नै डिहम । इमान्दारीताक साथ घोराही नागरिकहुकनके सेवक होक काम कर्टि आघ बहर्ने बाटु ।
लौव अग्रासन साप्ताहिकमसे साभार
