गढवा गाउँपालिकाके बिपन्न, सीमान्तकृत तथा अल्पसंख्यक समुदायक एकल महिलाहहुकन भूकम्प प्रतिरोधात्मक घर हस्तान्तरण कैगिल बा । सुरक्षित आवासके अभावम कठिन जीवन बिटैटी रलक एकल महिला तथा १६ वर्ष टरक लर्कापर्कन (बालबालिकाहुकन) लक्षित कैख ग्रामीण महिला उत्थान केन्द्र, निवास संस्थासे सञ्चालन हुइटी रलक एस.डब्लु.एफ.एच.ए.परियोजनाअन्तर्गत गढवा गाउँपालिकासे लागत साझेदारीम भूकम्प प्रतिरोधात्मक घर सम्पन्न पश्चात उक्त घर लाभान्वित परिवारहुकन औपचारिक रूपम हस्तान्तरण कैगिलक हो ।
गढवा गाउँपालिका वडा नं. ४ कट्याङ गाउँके प्रमिला चौधरी व वडा नं. ५ कक्रह्वा गाउँके जिवी विकह एक कार्यक्रमक बीच घर हस्तान्तरण कैगिलक हो । सोमारक डिन्वा गृहप्रवेश कार्यक्रममार्फत गढवा गाउँपालिकाक अध्यक्ष यमनारायण शर्मा, वडा नं. ४ क वडा अध्यक्ष हरिभगत चौधरी, वडा नं. ५ क वडा अध्यक्ष लेखबहादुर थापा तथा ग्रामिण महिला उत्थान केन्द्रके अध्यक्ष आशामानी चौधरीले संयुक्त रूपम घर हस्तान्तरण कर्लरलह ।
लौव घरपाइलपाछ प्रमिला चौधरी खुशी व्यक्त कर्टि एक दशकसे ढ्यार समय समय आनक घरम आश्रित होख बैस्टी अइलक पीडा सुनैली । श्रीमान् गम्भिस चौधरी रहलब्लाया आपन घर बनैना सपना डेख्लसेफे श्रीमानक निधनपाछ उ सपना अधुरो रलक उहाँ बटोइली । “कबु कल्पना निकर्लक आपन घर पाइबेर सपना जस्त लागल बा, उहाँ कलि, अब यीह घरमसे दुइ छाईन पह्रैना व जीवनके लौव यात्रा सुरु कर्ना आशा पलाइल बा ।” प्रमिलाके दुइ छाइ बाटिन ।
अस्टक जिवी बिकफे लौव घर पाइलपाछ खुशीले गद्गद् हुइलबाटि । उहाँके अन्सार पहिला घरक नाउम छोटीमोटि झोप्री रह, बर्खाम चुह, हिउँदम जारले सुटनिसेक्ना अवस्था रह । “खरले छाइल टहराम आधा जीवन बिटैनुँ,” उहाँ कलि, “पक्की घरम बैससबेर सपना जस्ट लागल लागठ ।” एक छावा व एक छाइ सहित जिवि लौव घरम बैस्ना सुरु कर्लि ।
गढवा गाउँपालिकाक अध्यक्ष यमनारायण शर्मा पालिकाभिट्टर रलक सिमान्तकृत, गरिब, विपन्न परिवार तथा एकल महिलाके लाग सुरक्षित आवास निर्माणह प्राथमिकताम ढर्लक बटोइल । “कौनाजहन फे घरविहीन हुइनिपरोस कैख पालिकासे ग्रामिण महिला उत्थान केन्द्रसे सहकार्य कैख विपन्न परिवारके घर निर्माण अभियानम जुटलबाटी, उहाँ कल,–गत वर्षफे चारठो घर बनाख हस्तान्तरण करलरलहीं, असौंक वर्ष तीनठो बनैली ।” अइना वर्षम फे कार्यक्रमके अभियानह निरन्तरता डेना उहाँ बटोइली ।
अस्टक ग्रामिण महिला उत्थान केन्द्रके अध्यक्ष आशामानी चौधरी बिपन्न, सीमान्तकृत तथा अल्पसंख्यक समुदायक एकल महिला व १६ वर्ष टरक लर्कापर्कन सुरक्षित आवास उपलब्ध करैना उद्देश्यले घर बनैलक बटोइली । उहाँके अन्सार प्रतिघर ६ लाख २५ हजार लागतम भूकम्प प्रतिरोधात्मक घर निर्माण कैगिल हो । सुरक्षित आवास निर्माणके लाग केन्द्र व निवास संस्थासे ४ लाख २५ हजार तथा गाउँपालिकासे २ लाख रुपैयाँके सहयोग हुइलक उहाँ जनैली ।
