माघह चौकस बनाइलाग थारु संघसस्थासे मघौटा विशेष कार्यक्रम कर्ना होडबाजि सुरु हुइल बा । अग्रसान खबर डटकमह खबर प्राप्त हुइल अनुसार थारु कल्याणकारिणी सभा लगायत थारु संघसस्थाके आयोजनाम पुस १८ गतेसे लग्ढार मघौटा म्याला आयोजना कैगिल बा ।
थारु कल्याणकारिणी सभा दाङके यीहि अठ्वार बैठक बैस्ख घोराहीम दुइडिन्या माघ महोत्सव आयोजना कर्ल बा । सभाके अध्यक्ष अशोक चौधरी पुस १८ व १९ गते घोराहीम माघ महोत्सव आयोजना कैगिलक जनैल । थारु कला, संस्कृतिके संरक्षण व प्रद्धर्वन कर्ना उद्देश्यले हरेक बरस माघ साँस्कृतिक कार्यक्रम कर्टि अइलक् बटोइल । १८ गते सन्झ्या ५ बजेसे धुम्रु गैटी बजार परिक्रम कर्ना व रात १० बजेसम कार्यक्रम स्थलम ढुम्रु गैना व १९ गते मघौटा नाच गान कार्यक्रम कर्ना निर्णय हुइलक अध्यक्ष चौधरी जनैल ।
ओस्टक थारु कल्याणकारिणी सभा क्षेत्र नं. ३ के यिह अठ्वार शनिवार वैस्लक कचेहरीमसे यिह पुस २३ व २४ गते तुलसीपुरम माघ महोत्सव आयोजना कर्लक सभाके सचिव जितेन्द्र चौधरी जनैल । महोत्सवह भब्य रुपम सफल बनाइलाग मेरमेमिह्रक उपसमिति फे गठन कर्लक उहाँ जनैल । थारु भाषा, संस्कृति, भेषभूषा हमार पहिचान, संरक्षण, सम्बर्द्धन व विकास हमार अभियान” कना नारा सहित दुइडिन्या महोत्सव आयोजना कैगिल उहाँ जनैल । उहाँके अनुसार पुस २३ गते ढुमरु गीत गैना व पुस २४ गते मघौटा सांस्कृतिक कार्यक्रम आयोजना कैगिल बा ।
ओस्टक घोराही उपमहानगरपालिका वडा नं। १७ वडा कार्यालयलके आयोजनाम पुस २० गते ओखरा गाउँम एक डिन्या माघ महोत्सव हुइना हुइल बा । थारु भाषा, साहित्य तथा थारु लोक कला, संस्कृतिके संरक्षण व प्रवद्धन कर्ना उद्देश्यले वडा कार्यालयके आयोजनाम गतवर्षठेसे महोत्सव आयोजना कर्टि अइलक् महोत्सव मुल आयोजक समितिके संयोजक एवं घोराही १७ के वडा अध्यक्ष रामलौटन चौधरी जनैल । पुस २० गते हुइना महोत्सवके तयारीह तिव्रता डेलक उहाँ जनैल । नाच दर्ताके लाग पुस १५ गतेसम समय डेलक फे उहाँ लौव अग्रासनह जनैल । महोत्वहह भब्य व सभ्य बनाइलाग समाजसेवी तथा थारु अगुवा घोराही १७ ओखरा निवासी मोहनलाल चौधरीके संयोजकत्वम ३५ सदस्यीय उपसमिति गठन कैगिलक अध्यक्ष चौधरी जनैल ।
अस्टक दंगीशरण गाउँपालिकाके हेकुलीम २६ व २७ गते हुइना हुइल बा । दंगीशरण गाउँपालिकाके आयोजनाम दुइ डिन्या महोत्सव आयोजना कैगिलक् दंगीशरण ३ के वडा अध्यक्ष शुकलाल चौधरी जनैल । सोमारक डिन्वा बैस्लक कार्यपालिकाके वैकमसे वडा नं। ३ क वडा अध्यक्ष शुकलाल चौधरीके संयोजकत्वम महोत्सव महोत्सव मुल आयोजक समिति गठन कर्लक चौधरी जनैल ।
ओस्टक थारु समाजके आयोजनाम शान्तिनगर थारु समाजके आयोजनाम शान्तिनगर ५ वैशाम पुस २५ व २६ गते दुइडिन्या मघौटा म्याला हुइना हुइल बा । समाजके अध्यक्ष यादव चौधरीके अनुसार शान्तिनगरम पहिला फ्यारा मघौटा म्याला आयोजना कैगिल हो ।
