माघ साँस्कृतिक महोत्सवम नाच निडलेक कटि गाउँ गाउँसे नाच अइलक नच्नौरी बगाल घुम्क गैल बाट ।
कार्यक्रमके नाउँ माघ साँस्कृतिक कार्यक्रम रलसेफे भाषणभिषणमके ढ्यार समय डेगिल रह । गाउँ गाउँसे नाच बलाख नच्ना समय निडिहलपाछ नाच अइलक सहभागीहुक्र असिन गुनासो कर्लक हुइट ।
‘हमार माघ हो, हमार कार्यक्रम हो कैख घरड्वार छोर्ख गाउँगाउँमसे आपन भाडा टिर्ख नाच अइली, घोराही उपमहानगरपालिका वडा नं. ९ के बुधनी चौधरी कलि,-तर हमन नच्ना समय निडेल ।’ बजारभर र्याली लगाइकलागभर हाली आओ, हाली आओ कल, नच्ना ब्याला डिनभर आस लगाख नाच निडेलक उहाँ गुनासो कर्लि ।
ओस्टक कार्यक्रमम नाच बलाख नाच निडेलक घोराही १० बजारी चौधरीफे दुखेसो कर्लि । ‘असिन थाहाँ रहट त हम्र नाच नि अइनेरलही, उहाँकलि, सक्कु कामछोर्ख आपन कार्यक्रम मान्ख नाच अइली, यिहाँ नेतनके भाषण सुन आइलसक केल हुइल ।’
ओस्टक सामाजिक अभियन्ता एवं युवा साहित्यकार प्रेम चौधरीफे असौंक जसिन खल्लो माघ महोत्सव कबु निहुइलक् बटोइल । ‘उत्सव के म्याला हो कना जन्ती जन्ती भाषण बढि कैजैठा, चौधरी आपन फेसबुककेवालम लिख्लरख्ल,-नाच डेना कैके र्यालीम बलाके नच्ना टोलीन नच्ना समय नै डे के भौजी पडली जसिन गीत म डान्स कर्ना समय डेजैठा ।’ ‘स्टेज म नच्ना टोलीन फे गन्जागोल चौधरी कल, सम्मान फे आपन आसे पासेन डेजैठा ।’
