प्रधानमन्त्री केपी शर्मा ओलीले देशके समृद्धि व विकासके लाग अखिसके सरकार बन्लक बटोइल । नेकपा (एमाले) दाङसे जिल्ला विकास समन्वय समितिके सहिद मञ्चम सोमरक डिन्वा आयोजना कर्लक जनसभाह सम्बोधन कर्टि नेकपा (एमाले)क अध्यक्षसमेत रलक ओली देशके विकास, समृद्धि, राजनीतिक स्थायित्व व लोकतन्त्रके रक्षाक लाग नेपाली कांग्रेस व नेकपा एमालेसहित दलहुक्र मिल्ख सरकार बनैलक बटोइल । किउ किउ मनै यी सरकार ढलि कैख ठाउँ ठाउँ भाषण कर्टि न्यांगट, उहाँ कल, तर, यी सरकार किउ कटिम निढल्ना समेत ठोकुवा कर्ल ।
‘यो सरकार २०८४ सम रही, किउ बोल्टी, रुइटी यी सरकार निढली, प्रधामन्त्री ओली कल, हमनसे स्पष्ट बहुमत बा, उकारण फे सरकार नि ढली, २०८४ सम कांग्रेस एमालेके नेतृत्वम सरकार निरन्तरता पइने बा ।’’ देशके विकासके लाग व राजनीतिक स्थायित्वके लाग दुई दलके उच्च समदारी अनुसार आब आपन नेतृत्वम सरकार बन्लक चर्चा कर्ल । उहाँ आपन नेतृत्वम सरकार बनलपाछ देश समृद्धतर्फ गैलक समेत प्रधानमन्त्री ओली दाबी कर्लरलह । देशह बदल्ना शक्ती एमाले बाहेक किउम निरलक बटोइटी प्रधामन्त्री ओली दाङके समग्र विकासक गम्भिर रलक बटोइल । ‘‘एमालेके गन्तव्य सुखी नेपाली, समृद्ध नेपाल बनैना हो, ओली कल, हरेक नेपालीह सुखी बनैना एमालेके व अखिसके सरकारके गन्तव्य हो ।
अखिसके सरकार सुन्दर नेपाल, सुखी नेपाली बनाइलाग दृढता व संकल्पसहित लागी पर्लक बटोइल । ‘देशके समग्र विकास, उन्नतिसँग दाङके विकासह विशेष ध्यानम ढर्लक बटोइल ।’’ मदनभण्डारी राजमार्ग योजना अनुसार दाङके घोराही तुलसीपुर सडकके चार लेनह आघ बह्रैलक प्रधानमन्त्री ओली जनैल ।
ओस्टक दाङ उपत्यका व देउखुरीह ज्वारक लाग सुरुङ मार्ग बनाख आपन दीर्घकालिन योजना रलक सुनैल । आगामी आर्थिक वर्षम यी विषयम ध्यान डेख बजेट विनियोजन कर्ना समेत बटोइल । ओस्टक उहाँ दाङके कृर्षियोग्य जमिनम सिँचाइ पुगाइलाग सिचाइ विशेष कार्यक्रमह फे ध्यान डेना बटोइल । काल्हिक डिनम दाङ विकासके हिसावले पाछ पर्लसे फे अब दाङ विकासम गति लेसेक्लक प्रधानमन्त्री ओलीक कहाइरलहिन ।
ओस्टक नेकपा (एमाले) क महासचिव शंकर पोखरेल भूमिसम्बन्धी विधेयकसहित सरकार अन्लक सक्कु विधेयक संसद् बैठकमसे पारित हुइना बटोइल । भूमिसम्बन्धी विधेयक संसदसे पास कैख सुकुम्बासी, भूमहिन तथा दलितके समस्या समाधान कर्ना बात बटोइल । सक्कु दलके नेताहुक्र सुकुम्बासी, भूमहिन तथा दलितहुकन भूमि उपलब्ध करैना प्रतिबद्धता करसेक्लकओर्से कौनो फे हालतम भूमिसम्वन्धि विधेयक पास करपर्ना बाध्यता रलक उहाँ बटोइल । ओस्टक महासचिव पोखरेल मुक्त कमैया, कमलरी, स्वर्गद्धारी गुठीपीडित किसानहुकनके समस्याह सम्बोधन कैख उचित न्याय डेनाम अखिसके सरकार लागि पर्लक दाबी कर्ल ।
ओस्टक आबके सरकार दाङको समग्र विकासह आघ बह्रैनाम तडारुक्ताके साथ लग्लक महासचिव पोख्रेल बटोइल । दाङके बृत्तर विकास व समृद्धिक लाग गुरु योजना बनाख आब बहर्टी रलक जनैल । दाङके घोराही तुलसीपुरके चार लेनक सडक निर्माणके काम आघ बहसेक्लक बटोइटी आब एकदुइवर्षम दाङ विकासके मुहार फेर्ना जनैल ।
मुक्त कम्लहरीसे प्रधानमन्त्रीके ध्यानाकर्षण
मुक्त कम्लहरीहुक्र सरकारसे हुइलक १० बुँदे सहमति कार्यान्वयनके माग कर्टी प्रधानमन्त्री केपी शर्मा ओलीके ध्यानाकर्षण करैल बाट । एमालेके जनसभा कार्यक्रमस्थलम पुग्ख मुक्त कम्लरीहुक्र प्रधामन्त्रीके ध्यानाकर्षण करैलक हुइट । एमाले नेतृ एव पूर्व सांसद शान्ता चौधरी, मुक्त कमलरी विकास मञ्चके केन्द्रीय अध्यक्ष हिरामोती चौधरीसहितके नेतृत्वम गइलक प्रधानमन्त्री ओलीके ध्यानाकर्षण करैलक हुइट । मञ्चक अध्यक्ष चौधरीके अनुसार मुक्त कमलहरीके पुनस्र्थापना, परिचयपत्र, उच्च तथा प्राविधिक शिक्षा व अभिभावक बिहीन तथा जग्गा जमिन निरलक मुक्त कम्लहरीहुकन जमिन उपलब्ध कराइ पर्ना लगायत विषय माग कर्ल बटोइली ।
ज्ञापनपत्र बुझ्टी प्रधानमन्त्री ओली मुक्त कमलरी, कमैया तथा भूमहिनहुकनके मागह सम्बोधनक लागि आपन नेतृत्वके सरकार गम्भीर होक लग्लक बटोइल रलह । वाकरलाग आयोग गठन समेत कर्लक जनैल । ओस्टक स्र्वद्धवारी गुठी पीडित संघर्ष समितिसे फे प्रधामन्त्री ओली आपन मागके विषयम ध्यानाकर्षण करैल रलह । एक बर्ष आघ सरकार व सघर्ष समितिविचम हुइलक सहमतिह कार्यान्वयनकेलाग प्रधामन्त्री ओलीके ध्यानाकर्षण करैलक संघर्ष समितिके सहसचिव प्रविण थारु जनैल ।
