माघ साँस्कृतिक महोत्सवम-२०८१ ह भब्य रुपम सम्पन्न कराख सहयोग पुगैलकम थारु कल्याणकारीणि सभा दाङसे सक्कु कबिला (सरोकारवाला) हुकनम हार्दिक अभार एवं धन्यवाद व्यक्त कर्ल बा । अट्वारक डिन्वा सभाके अध्यक्ष अशोक चौधरी महोत्सवम आर्थिक, भौतिक, नैतिक रुपम सहयोग पुगैलक सक्कु कबिलाहुकन सामाजिक सञ्जाल मार्फत धन्यवाद ज्ञापन करल हुइट ।
थारु कल्याणकारिणी सभा दाङ देउखरके आयोजनाम हुईलक महोत्सवह ऐतिहासिक रुपम भब्य तरिकाले सफल कराईगलाग मुख्य रुपम आर्थिक सहयोग करुईया स्थानीय सरकार घोराही उपमहानगरपालिकाके नगर प्रमुख नरुलाल चौधरी व लुम्बिनी प्रदेशके पर्यटन तथा यातायात मन्त्री प्रचण्ड बिक्रम न्योपानेह विशेष धन्यवाद डिहल बाट । आयोजक सस्थाके अनुसार महोत्सवकेलाग घोराही उपमहानगरपालिकासे २ लाख ५० हजार, लुम्बिनी सरकारसेफे २ लाख ५० हजार सहयोग डिहल रह ।
ओस्टक ब्यक्तिगत व सस्थागत रुपमा विभिन्न सहयोग कर्लक् सरकारी तथा गैरसरकारी संस्था व प्रचारप्रसारम सहयोग पुगैलक पत्रकार, संचार माध्यमहुकनफे आयोजक सस्थासे धन्यवाद व्यक्त कर्ल बा । अस्टक आपन सस्कार सस्कृति बचाई पर्ठा कैक गाउँगाउँसे महोत्सवम नाच अइलक नच्नौरी टोली, सहभागी लगायत प्रत्यक्ष अप्रत्यक्ष रुपम सहयोग करुईया कबिलाहुकन आयोजक सस्था थारु कल्याणकारी सभा दाङके टर्फसे धन्यवाद ज्ञापन कर्ल बा ।
काम कर्ना ब्याला कबुकाल जान अन्जानम कमि कम्जोरी होजैठा, अइनाडिनम उ कमिकम्जोरीह सुढर्टी जैना फे सभाके अध्यक्ष चौधरी प्रतिवद्धता व्यक्त कर्लबाट । महोत्सवक पुस १८ गतेसे २० गतेसम आयोजना कैगिल रह । ब्यानरम महोत्सव तीन डिन कलसे फे खास कार्यक्रम एक डिन कैगिल रह ।
