दाङम जुरमुरैटी महटावा

मंसिर ४ के चुनाउके मिति लग्घ अइटि रहल ब्याला दाङम थारु महटाहुक्र जुर्मुरैटि बाट । यिह अठ्वार शनिच्कर डिन्वा गाउँ गाउँमसे महटावाहुक्र घोराहीम भेला हुइल हुइल । भेला हुइनाके मुख्य उद्देश्य रह, मंसिर ४ गते हुइना प्रतिनिधि सभा व प्रदेश सभाके निर्वाचन केन्द्रीत छलफल । अइना निर्वाचनम महटावाहुकन्हक भूमिका व महटावाके एजेण्डा रना कना विषयम घनिभूत रुपम छलफल हुइलक महटावा महासंघ दाङक अध्यक्ष चन्द्रप्रसाद चौधरी बटोइल ।

चुनाउके ब्याला नेताहुक्र गाउँ अइना व विभिन्न आश्वासन डेख थारुन भोट बैंकिङके रुपम बेल्सना कर्लक् ओर्से आब चुनाउके समयम थारु समुदाय सचेत हुइपर्ना उहाँ बटोइल । हमार समुदायक भोटले साँसद, मन्त्री बन्ना तर थारु समुदायके मुद्दा ओस्टके ओस्टह बा, उहाँकल, ‘आब आपन मुद्दा, एजेण्डा लिखित रुपम प्रतिवद्धता निहुइकसम उम्मेद्वारहुकन भोट नि डर्ना रणनीति बनाइटि ।’

‘हमार माग, मुद्दाके सुनुवाइ जे करी, उहिन थारुनके भोट कैख थारु कोर भिलेजम अभियान चलैना छलफल कर्टि बाटी, उहाँकल, जे थारु गाउँ गाउँम भुह्यारथान, महटावा सभा गृह बनैना सुनिश्चता करी, उहिन हमार भोट जाइ ।’ ओस्टक सिँचाइ, कुल्वा, वाँध बनैना, किसानह सहुलियत विउविजन, अनुदान व रासायनिक मलके व्यवस्था कर्ठा, उ उम्मेदवारह छलफल कैख भोट डारक लाग आवश्यक पर्लसे ह्विप जारी कर्ना समेत बटोइल ।

कत्रा बाट्, थारु मतदाता ?
दाङ जिल्लाम कुल जनसंख्याके ३७.५ प्रतिशत थारु समुदायके जनसंख्या बा । दाङम आब कुल मतदाता ४ लाख १४ हजार ९५६ बा । यी मध्ये थारु समुदाय केल डेढ लाख मतदाता रलक अनुमान कैगिल बा । उहओर्से जिल्लाम थारु समुदायके मतदाता निर्णायक मानजिठा । थारु समुदायह जे प्रभाव पार स्याकल उह आबसम निर्वाचन जिट्टी अइलके पूर्वसांसदहुक्र बटोइठ ।

थारु समुदायके मत आपनओंर तानकलाग राजनीतिक दलहुक्र आब थारु कोर एरियामा छिर्ना व महटावाहहुकन प्रभावित कर्ना काम कर्ठ । महटावा थारु गाउँके मुख्य व्यक्ति हुइलक् ओर्से चुनाउके ब्याला थारु गाउँम नेताहुक्र महटावाके वरीपरि रना कर्ठ  । महटावा ह्विप कर्लसे सक्कुज मन्ठ ओ उह अनुसार भोट डर्ठ कना नेताहुकनम विश्वास बा ।

दाङम कत्रा बाट, महटावा
थारु कल्याणकारिणी सभा दाङके अनुसार दाङम आठ सयसे ढ्यार महटावा रहल बाट । देउखुरी उपत्यकाम महटावाह ककनदार कैजिठा । आब विविध कारणले कुछ गाउँम महटावा निरलसे फे अधिकांश गाउँम महटावा रलक सभाक अध्यक्ष भुवन चौधरी बटोइल । उहाँके अनुसार बंगलाचुली गाउँपालिका बाहेक सक्कु पालिकाम महटावाहुकनके बल्गर उपस्थिति बा । सब्से ढ्यार घोराही उपमहानगरपालिकाम महटावा बाट । उहाँके अनुसार घोराहीमा २ सय ५० के हाराहारीम महटावा रहल बाट । ओस्टक तुलसीपर उपमहानगरपालिकाम दुइ सय बहुट महटावा रहल बाट । ओस्टक दंगीशरण गाउँपालिका, शान्तिनगर गाउँपालिका, बबइ गाउँपालिकाम फे महटावा रहल बाट । ओस्टक देउखुरी उपत्यकाम लमही, राजपुर, गढवा व राप्ती गाउँपालिकाम फे बहुट महटावा (ककनदार) रलक सभा जनैल बा ।

अग्रासन खबर

प्रतिक्रिया दिनुहोस्

भर्खरै प्रकासित