घोराही उपमहनगरपालिकाके सहयोगम थारु भाषा, कला, संस्कृति सम्बन्धि आधा दर्जनसे ढ्यार पोष्टा प्रकाशन हुइल बा ।
थारु कल्याणकारिणी सभा, लौव अग्रासन साप्ताहिक सहित थारु संघसस्थाके समन्वयम थारु जातिके भाषा, कला, संस्कृतिके उजागर कर्ना उद्देश्यले मेरमेह्रिक पोष्टा प्रकाशन कैगिलक घोराही उपमहानगरपालिकाके सूचना अधिकृत भिमबहादुर चौधरी जनैल । उहाँके अनुसार लौव अग्रासन साप्ताहिके समन्वयम थारु समुदायक भोजहा गीत, माघम गाजैना ढुमरु गीत, थारु समुदायके कला, संस्कृति झल्कना फाटु विशेष थारु फोटु पोस्टा प्रकाशन हुइल बा । ओस्टक मांगर, बर्कीमार गीत रेर्कड कैख युट्यूबम फे ढैगिलक उहाँ जनैल ।
असहक घोराही उपमहानगरपालिकाके आपन प्रकाशनम थारु लोकमहाभारतसे जोर्गिलक बर्किमार गीत पोष्टा प्रकाशन कैगिल बा । यी बर्किमारम सम्ह्रौटि, लखागिरक् पैढार, जट्यक पैढार, राउवेढक पैढार, बन्बासक् पैढार, घरबासक पैढार, हँठ्यक पैढार, सुसुर्माक पैढार, बर्किमार पैढार लगायत सम्याटल बा ।
ओसहक थारु शब्दके उत्पत्ति, थारु जातिके थर, उपथर, डँगौंरा थारुके थर निर्माण, प्रकृति, घोराही उपमहानगरपालिका भिट्टर थारुन्हक चिनारी, थारुन्हक हस्तकला, लोककाब्य, गुर्वावाक जर्माैटी, लगायत विषय सम्यट्ख घोराही थारु प्रदर्शनकारी कला पोस्ट ा प्रकाशन हुइल बा । यी पोष्टाम थारु समुदायके अस्टिम्की, सख्या लोककाब्य, बर्किमार लोक काब्य, मांगर, ढुम्रु, मघौटा गीत, सज्ना मैना गीत सम्याटल बा । ओस्टक थारु समुदायक मेरमेह्रिक टैटिह्वार, पूजापाठ, संस्कार, संस्कृतिके बारेम उल्लेख कैख पोष्टा प्रकाशन कैगिल बा । लोप हुइटि रलक थारु भाषा, कला, संस्कृतिके उजाकर कैख उहिन दस्तावेजिकरण कर्नाम घोराही उपमहानगरपालिकाके महत्वपूण काम हुइलक थारु कल्याणकारिणी सभाके अध्यक्ष भुवन चौधरी बटोइल ।
ओस्टक घोराही उपमहानगरपालिकाके नगरप्रमुख नरुलाल चौधरी स्थानिय भाषा, कला, संस्कृतिके संरक्षण व प्रवद्धन कर्ना स्थानीय सरकारके दायित्व हुइलक् ओर्से यिहाँक सक्कु समुदायके भाषा, कला, संस्कृतिके संरक्षण व प्रवद्धन कर्ना काम कर्टि रलक बटोइल । स्थानिय कला, संस्कृति कलक् पर्यटन व समृद्धिके आधार हुइलक् ओसै स्थानयि सरकार यी क्षेत्रम विशेष सहयोग कर्टि अइलक जनैल ।
