पुर्व राज्यमन्त्री, थारु संस्कृतविद तथा अध्येता महेश चौधरीके गइल बुधक डिन्वा निधन हुइल बा । राप्ती स्वास्थ्य विज्ञान प्रतिष्ठानम उपचारके क्रमम चौधरीके निधन हुइलक हो । ७२ वर्षिया चौधरी गइल अठ्वार काठमाडौंम हर्नियाको शल्यक्रिया कैख गृह जिल्ला दाङ आइल रलह ।
राष्ट्रिय सभा सदस्य हुइटी राज्यमन्त्री समेत रलक चौधरीके नेपालके भूगोल, संस्कृति व थारू सभ्यताम बहुट योगदान बाटिन । भूगोलका प्राध्यापक समेत रलक चौधरी पश्चिम तराईके भूगोल व थारू सभ्यताक बल्गर अध्येता हुइट । उहाँके भौतिक शरीर निरलसेफे नेपालको इतिहास, भूगोल, संस्कृति व थारू सभ्यताबारे दर्जन ढ्यार विषयम अनुसन्धानमूलक दस्तावेज हमार माझ छोर्ख गइल बाट ।
२००७ सालम दाङके तत्कालीन हेकुली गाविसके बैबाङम जन्मिलक चौधरी भूगोल विषयम स्नातकोत्तर कर्ल । वाकरपाछ उहाँ वामपन्थी आन्दोलनम लग्ल । स्वर्गीय कम्युनिष्ट नेता नेत्रलाल अभागीसे किसान आन्दोलनसे आघ सर्लक चौधरी थारू समुदायम चेतना फैलैनाम लग्ल । २०२८ सालम थारू भाषाके पहिला पत्रिका ‘गोचाली’ के संस्थापक सम्पादक हुइट । चौधरी थारू भाषाके पहिलो गीति नाटक ‘छारा’ प्रकाशित फे कर्ल । जहाँ उहा भूमि छोर्ख जाइ निहुइट कैख बहुट नाटक मञ्चन कर्टि थारूहुकन बुह्रान जैनासे रोक्लक भूमिका ख्याल बाट । थारू समुदाय भिट्टर रलक सामाजिक कुरीति व अन्धविश्वास हटैना जागरणमा उहाँके महत्पूर्ण योगदान बाटिन ।
२०४१ सालओंर प्राध्यापन लग्लक चौधरी दाङ स्थित महेन्द्र बहुमुखी क्याम्पसम भूगोल विषयके अध्यापन करैल । ओस्टक विभागके प्रमुख हुइलक चौधरी २०४६ सालपाछ उहाँ सक्रिय राजनीतिम लागल रलह । २०४८ व २०५४ सालम कैख दुइ फ्यारा राष्ट्रिय सभा सदस्य बन्लक चौधरी २०५४ सालम राष्ट्रिय सभा सदस्य हुइबेर स्थानीय विकास राज्यमन्त्री समेत बन्ल । पाछ २०६४ सालम पहिला संविधानसभा सदस्य बन्ल । राजनीतिक व्यस्तता बीच उहाँ आपन अध्ययन व अनुसन्धान फे जारी ढर्टी अइल । उहाँ ‘द हिडनट्रेजर अफ द लो ल्याण्ड नेपाल (भाग–१ व २)’ नेपालको तराई तथा यसका भूमिपुत्रहरू व स्थविरहरूको प्राचीन इतिहास र संस्कृति लगायत दर्जनौ पुस्तक प्रकाशन हुइलबाटन । पाछक समयमा उहाँ जैविक मलबारे अध्ययन(अनुसन्धानम व उत्पादनमा लागल रलह । दाङके घोराही उपमहानगर १७ बेलभारम सूर्यशक्ति सुपर जैविक प्राङ्गारिक मल उत्पादन केन्द्र संचालन कर्टि जैविक प्राङ्गारिक मल उत्पादन कर्टि आइल रलह
