घोराही, १३ अगहन । नेकपा एमालेके दशौं राष्ट्रिय महाधिवेशनमसे दाङके शंकर पोख्रेल महासचिवम निर्विरोध निर्वाचित हुइल बाट । लुम्विनी प्रदेशके प्रथम मुख्यमन्त्री समेत रलक पोख्रेल यिहिसे आघ नेकपा एमालेके केन्द्रीय स्थायी कमिटिके सदस्य रलह । विद्यार्थी राजनीतिसे सुरु कर्लक पोख्रेल अनेरास्ववियके केन्द्रीय अध्यक्षठेसे पार्टीके महासचिव सम पुग्लक नेता पोखे्रल बैचारिक व जबजके ब्याख्याताके रुपम परिचित बाट ।
पोख्रेल संगसंग दाङके दुई प्रभाव शाली नेतृहुक्र फे निर्विरोध निर्वाचित हुइल बा । नेकपा एमालेके स्रोतके अनुसार नेकपा एमालेके संघीय संसदीय दलके सचेतक समेत रलक प्रभावशाली नेतृ तथा पुर्व कमलरी घोराही उपमहानगरपालिका ४ डाँडागाउँ गोग्ली स्थित शान्ता चौधरी महिला खुला सदस्यम निर्विरोध निर्वाचित हुइल बाट । ओस्टक थारु कोटामसे राप्ती गाउँपालिका स्थित सिसहनियाके गंगा थारु फे निर्विरोध निर्वाचित हुइल बाट । ओस्टक दाङके नेतृ मेनका पोख्रेल लुम्विनी भुगोलमसे निर्विरोध निर्वाचित हुइल बाट । ओसहक निर्विरोध हुइनाम खुला महिला सदस्यम सुजिता शाक्य, सिता सिग्देल न्यौपाने, कोमल वली, मुस्लिम समुदायमसे साजिदा सिद्दकी रहल बाट ।
उपाध्यक्षम यवराज ज्ञावली, केन्द्रीय सदस्यम नरुलाल चौधरी, घनश्याम पाण्डेय निर्विरोध निर्वाचित कलसे फे अन्तः सहमति निहोख फेसे चुनाउ हुइटी रलक नेकपा एमाले स्रोत जनैल बा ।
केन्द्रीय समितिम १२ थारु नेता
नेकपा एमालेके १० औं राष्टिय महाधिवेशनमसे १२ थारु नेता अइना सम्भवाना डेख परल बा । एमालेके विधान अनुसार ७ ज थारु कोटामसे निर्वाचित हुइना उल्लेख कैगिल बा । यि संगसंग विभिन्न क्लस्टरमसे फे थारु नेताहुक्र निर्वाचि त हुइना सम्वभावना रलक नेकपा एमालेके नेतृ शान्ता चौधरी जनैली । एमालेके स्रोत अनुसार थारु कोटा बाहेक अन्य कलस्टमसे ५ थारु नेता निर्विरोध हो स्याकल बाट । महिला खुल्ला सदस्यम प्रभावशाली नेतृद्धय शान्ता चौधरी, भगवति चौधरी निर्विरोध निर्वाचि हुइल बाट । ओस्टक भुगलमसे राजकुमार लेखी, गौरीशंकर चौधरी व थारु कोटाके महिला सदस्यम गंगा चौधरी व मञ्जु र्चाधरी निर्विरोध निर्वाचि हुइल बाट ।
ओस्टक थारु कोटाम नरुलाल चौधरी, बैजनाथ चौधरी, कृपाराना थारु, बलविर चौधरी निर्विरोध निर्वाचित कलसे फे जयप्रकाश चौधरीके उम्मेदा्वारी परल पाछ चुनाउ हुइना हुइल बा । यदपी यी मध्य ५ थारु नेताहुक्र निर्वाचित हुइना विधानम उल्लेख बा ।
