आब मैसंग्संग् गाउँक ३० घरके फे व्यावसायिक टीन खेती कर्टी अइलक उहाँ बटोइल । “ मैै उहाँहुकन टीना खेती करकलाग प्रेरित कर्नु, उहाँ कल, “गाउँके डाडुभैयाहुक्र म्वा कामसे प्रभावित होख टीना खेतीम लग्लकम मै बहुट खुशी बाटु ।” टीना खेतीमे दुइ विघा जग्गा जोर्लक उहाँ बटोइल । “आब उ जग्गाके मूल्य करिब दुई करोड परसेकी, उहा कल, “छाइछावन पह्रैनाम बहुट खर्च हुइल, नै ट बहुट जग्गा जमिन जोरसेक्ने रनहुँ ।” लर्कनके पह्राइम लगानी कर्लकम मै आपन्हे गर्व कर्ठु,उहाँ कल, “मै बहुट पह्र निसेक्लसेफे आपन लर्कापर्कन पह्राइ पैलकम खुशी बाटु ।” आपन छाइछावा सहित भाइ व भान्जीह पह्रैना, हुर्कैना जिम्मेवारी कर्लक उहाँ बटोइल । उहाँके अन्सार एक्ठो छाइ जापानम मास्टर्स अध्ययन कर्टी बाटीन । और छाइ बैँकम जागिरे बाटिन । छाइछावा पहरलिक्ख जिम्मेवारी निर्वाह करलपाछ गर्बके महसुस हुइलक उहाँ बटोइल ।
२०७४ के स्थानीय तह निर्वाचनम जनप्रतिनिधि बन्लक पूर्णबहादुर आबफे कृषि खेतीम जमल डेख्ख गाउँक डाडुभैयाहुक्र खुशी बाट । आपन मेहनत, परिश्रमले सफलता पैलक पूर्णबहादुर आब गाउँकेल निहोख सिंगो समुदायक लाग उदाहरणीय बनलबाट । यदपी कबुकाल आपन उत्पादन करल टीना बजार निपाइबेर निराशा बनैना कर्लक उहाँ बटोइल । ”कबुकाल बजार निपाख टीना कुजिठा, कबु गाउँसे बोक्क ओत्रा डुर बजारसम लैजैबो, टीनाक मुल्य कहलअसक निपाइबेर मन दुखद, उहाँकल, किसानके उत्पादनके मूल्य किसानसे निर्धारण करपाइर्ठा ।” व्यावसायिक खेतीम नाफा-घाटा सामान्य हुइलसे फे कृषि क्षेत्रह सम्मानजनक व्यवसायके रूपम स्थापित कैख सरकारसे बजार व्यवस्थापनम लाग पर्ना उहाँके कहाइ रह । टीना खेतीसंगसंग उहाँ कोक्नी, धान व लाही खेतीम फे ओत्रह सक्रिय रलक पूर्णबहादुरके बारी ह्यार अइना बजारसे मटेरा पुग्ना कर्ठ ।
“पूर्णबहादुरो निरन्तर मेहनत व परिश्रम बहुट लोभलक्टिक बा, थारू कल्याणकारिणी सभाके केन्द्रीय कोषाध्यक्ष चूर्णबहादुर चौधरी बटोइल, “मनैनके आँट व सङ्कल्प कर्लसे घरम बैस्खफे जीवन परिवर्तन कर सेज्ना रहेछ कना उत्कृष्ट उदाहरण पूर्णबहादुर हुइट ।” राज्यसे किसानहुकन सहुलियत दरम मल, बीउ-बिजन, सिँचाइ व उत्पादनके बजार व्यवस्थापन उपलब्ध करैलसे स्वदेशम कृषकहुक्र आत्मनिर्भर बन्न सेक्ना उहाँके कहाइ रह ।
