लौव अग्रासन १६ वरष पुग्ख १७औं वरषम पैला टेक्राखल । यी सुखद अवसरम सब्से पहिला सक्कु मैगर कबिलाहुकन हार्दिक शुभकामना बा । १६ बरस आघ अर्थात २०६५ अगहन २४ गतके डिनसे लौव अग्रासन साप्ताहिक पोष्टा घोराहीसे औपचारिक रुपम प्रकाशन सुरु हुइल रह ।
‘एक घर, एक अग्रासन’ कना नारा सहित थारु भाषा, साहित्य, कला, संस्कृतिके प्रवद्धन कर्ना उद्देश्यले सुरु हुइलक यी अभियान आब फे निरन्तर जारी बा । सम्भब त नेपालम थारु भाषक पोष्टा अत्रा नम्मा समयसम निरन्तर प्रकाशन हुइना एकठो साप्ताहिक पोस्टा हुई, लौव अग्रासन । यी जमानम पत्रपत्रिका प्रकाशन कर्नाम आपन्हे चूनौति बा । उहम थारु भाषक पोस्टा निकर्ना कत्रा भारी चूनौति हुइ कना त सायद हमनकेल थाहाँ हुइ ।
यदपी मैगरक कबिलाहुकनके सहयोग व साथले आज यी ठाउँम अग्रसान अरगरइल बा । ओत्रकेल निहोख यी डेढ दशकसे ध्यार सयमके अनुभव ओ अभ्यासले हेर्ना हो कलसे आब पहिलासे थप परिपक्व ओ परिमार्जित हुइटी आइल बा । यी डिजिटल जमाना अनुसार लौव अग्रासन अनलाइन संस्करण फे अन्ल बा । आब लौव अग्रासनम छप्लक् सामग्री सहित लौव लौव खबरफे www.agrasankhabar.com लगइन कैख संसारके जौन कोनोमसे उठ्ख, सुत्ख, बैस्ख फे ह्यार सेक्ना हुइल बा । अइना डिनम यिहन पहर्नाकेल निहोख सुन्ना व हेर्नाफे बनैना संकल्पलेक आघ बह्रल बा ।
थारु भाषाके माध्यमसे आम समुदायह सुसुचित कर्टि यीहाँक आर्थिक, सामाजिक सांस्कृतिक परिवर्तनहँ समेत योगदान डेना कना चानचुने विषय निहो । हुइना त एक्ठो शसक्त संचार माध्यके हिसाबले अत्रा अभिभारा कर्ना अग्रासनके दायित्व फे हो । ज्या हुइलसेफे थारु भाषा, साहित्य व कला संस्कृतिके संरक्षण प्रवद्धन कर्ना संगसंग याकर अभिलेखीकरण, दस्तावेजिकरण कर्ना कामम लौव अग्रासन अग्रणी भूमिका खेल्ल बा । ओस्टक स्थानीय स्तरम उठल सामाजिक, सांस्कृतिक, आर्थिक, राजनैतिक शैक्षिक, स्वास्थ्य लगायतके बहुट विषयम रिर्पाेट, समाचार लेख, रचना संम्प्रेषण कर्नाम फे आघ बा ।
समाजहँ सहि डगरम नेङगैना कामम अगुवाई जिल्लाके बृहत्तर विकासम आपनओर्से सहयोग पुगैल बा । अन्यत्मं यिहासम पुगैना हमार मैगर कबिला, पाठक, विज्ञापनदाता लगायत सक्कुजहन एक फ्यारा हमारओर्सै मैगर स्यावा कर चाहटी । यी पोष्टाह आम्हिन मजा बनाइलाग सक्कुज आ–आपन ठाउँमसे स्याकल सहयोग, रचनात्क सुझावा कर्टि रबी कना आशा व अपेक्षा सहित सक्कु मैगर कबिलाहुकन यी विशेष अवसरम सक्कुजहन हार्दिक बधाई सहित स्यावा ढ्वाग लागटी ।
जय गुर्वाबा !
(गइल अठ्वार अगहन १५ गतेके लौव अग्रासन साप्ताहिकके सम्पादकीय)
