जब लालबीर बर्दियाम लाल झण्डा फरफरैल

रेशमलाल चौधरी आब डिल्लीबजार कारागारम टीकापुर घट्नाके आरोपम जेल सजाए भोग्टी बाट । थरुहट आन्दोलनके क्रमम ०७२ भदौ ७ गते ८ जन सुरक्षाकर्मी व एक नाबलकके ज्यान ज्यान गैल रह । उह घट्नाके मुख्य योजनाकारके रुपम अदालतसे रेशमलाल चौधरी सहितह एक दर्जन थारुहुकन जन्मकैद सजाए सनाइल ।

वाकरपाछ रेशम भूमिगत हुइल । यदपी उहाँ २०७४ के निर्वाचनम टीकापुरसे आपन निकटम प्रतिद्धन्दीसे तेब्बर मत आन्क विजयी हुइल । तर संसद भर छिर निपैल । उह रेशमके बाबा लालबीर चौधरी यिह अगहन (मंसिर) ४ गते हुइलक चुनाउमसे बर्दिया २ मसे निर्वाचित हुइलबाट । आपन प्रतिस्पर्धीह १३६ मतले पाछ पार्क लालबिर विजयी हुइल । स्वतन्त्रमसे उम्मेदवारी डेक विजयी हुइलपाछ रेशमके बाबा लालबीर एकएक चर्चाम बाट । लालबीर २६ हजार ५२० मत प्राप्त कर्लरलह कलसे उहाँके प्रतिस्पर्धी सत्तारुढ गठबन्धके तर्फसे उम्मेदवार बन्लक नेकपा माओवादी केन्द्रके सुरेश पन्थ २६ हजार ३८४ मत प्राप्त कर्लरलह । ओस्टक नेकपा एमालेक पंकजसिंह रठौर १६ हजार ९० मत प्राप्त कर्ल रलह ।

लालविरके बाबा हस्तराम थारु २०३६ सम् बर्दियाम बैसठ । पाछ लालबिरके बाबा सहित दुइभाई २०३६ ओंर बर्दियासे कैलालीके टीकापुरम बसाइसराई करलरलह । उहाँके बाबा हस्तरामके ६ भाई मध्ये ४ भाई आब फे बर्दियाम बैस्ठ । गाउँके बरघर हुइटी राजनीतिम अइलक लालबीर नम्मा समयसे नेकपा एमालेम आवद्ध रलह । २०७४ के निर्वाचनम नेकपा एमालेक तर्फसे कैलाली १ के (क) से प्रदेश सभा सदस्यके उम्मेदवार बनल रलह । तर, राजपाके कृष्ण बहादुर चौधरी लालबीर पराजित हुइल ।छावा रेशम चौधरी जेल परलपाछ आपन छावक रिहाइके लाग नेकपा एमालेके अध्यक्ष तत्कालिन प्रधानमन्त्री केपी शर्मा वलीह भेटक हारगुहार कर्ल । तर, रेशम रिहाइ निहुइल । यदपी लालबीरके दबाब व रेशम चौधरीके तत्कालिन पार्टी जसपाके दबाबले रेशमह सपथ ग्रहण करागिल् । यदपी, रेशम संसद भर छिर निपैल । पाछ जसपा पार्टीमा फुटल तब रेशम तथस्थ बैस्ल । अन्ततः स्थानीय तहके चुनाव आघ रेशम चौधरी आपन जन्नि रंजिता श्रेष्ठ चौधरीके नेतृत्वम नागरिक उन्मुक्ति पार्टी गठन कर्ल । उक्त पार्टी कैलालीम चार स्थानीय तहमा विजयी हुइना सफल हुइल  ।

वाकर पाछ सुस्ट सुस्ट नागरिक उन्मुक्ती पार्टीके प्रभाव बहर्टि गैइल । यिहोंर रेशमके बाबा फे आपन छावक पार्टीसे प्रभावित हुइल । नम्मा समयसे एमालेम आवद्ध रलक लालबीर अन्ततः एमाले परित्याग कैख सूदुरपश्चि प्रदेशसे लुम्विनी प्रदेशके बर्दिया २ म प्रतिनीधि सभा सदस्यम उम्मेदवारी डेल । तर, लालबीरके उम्मेदवारी आपन स्वविवकेल केल निहोक छावा रेशमके सल्लाहम बर्दिया २ स्वतन्त्रमसे उम्मेदवारी डेलक नागरिक उन्मुक्ति पार्टीक नेताहुक्र बटोइठ । रेशमके विकल्पम लालविरके उम्मेदवारी रह । रेशमह आबके संविधान अनुसार आपन उम्मेदवारी खारेज हुइसेक्ना थाहाँ रलहिन, उन्मुक्ती पार्टीके प्रबक्ता दामोदर पण्डित कल(रेशमके उम्मेदवार खारेज हुइलसे लालविरह समर्थन कर्ना योजना पहिला जो रह, अन्ततः उह हुइल ।’रेशमके उम्मेदवारी खारेज हुइलपाछ लालबीरह नागरिक उन्मुक्ती पार्टी समर्थन करल । वाकर पाछ लालबीरके चर्चा बन्टि गइल । यदपी बर्दियाक लाग लालबीर लौव अनुहार निरलह । बर्दियाम लालबीर पहिला से परिचित रलह । उहाँके ध्यारजसो परिवार बर्दियाम बैस्ठ । राजनीतिक, सामाजिक अगुवाके हिसाबले व रेशमका कारण फे लालबीर बर्दियाम परिचत होस्याकल रलह ।

निर्वाचन आयोगसे लालबिरह (नल्का) चुनाउ चिन्ह डिहलपाछ आपन चुनावी रणनीतिर्ह ब्यापक बनैटी बस्ति बस्तिसम पुग्ल । नेकपा माओवादी केन्दके लालकिल्लाके रुपम चिन्जैना बर्दिया निर्वाचन क्षेत्र नं. २ म निर्वाचन जित्न सहज निरह लालबीरह । २०६४ से बर्दिया २ म माओवादी लगातार जिट्टी अइलक क्षेत्र हो । आब झन सत्तारुढ गठबन्धन नेपाली काँग्रेस नेपाली काँग्रेस, नेकपा एकिकृत समाजबादी सहितके समर्थनम उम्मदेवार बन्लक् माओवादी केन्द्रक सुरेश पन्थसे जुध्ना कम्ति सजिलो निरह लालबीरह ।

यदपी उहाँ हरेश निखैल शतिसाल उहा लालबीर निर्वाचनम खट्ल । आपन छावा रशेमसे नियमित संम्पर्क रटि रशेमके फोटु छाटीम टाँस्ख आपन प्रचारप्रसारह तिब्र बनैल । गाउँ गाउँ, बस्ति बस्तिम डुल्टि भोट मंग्टि चुनाउके प्रचारप्रसार कर्ल । सक्कुजहनके साथ पैल लालबीर । अन्ततः बर्दिया २ म लालबीर लाल झण्डा गार्क छोर्ल । विजयी हुइल । प्रतिनीधि सभा सदस्यम विजयी हुइलपाछ लालविर चौधरी आपन जीतसे फे जन्तनके जित हुइलक बटोइल । यि जित म्वार निहोक बर्दियाक जनताहुक्र रेशमके न्यायक लाग महिह जिटैल । उहाँकल, ‘राजनीतिक अधिकार व न्यायके लाग आवाज उठाइबेर रेशमह झुठ्ठा मुद्दा लगाक जेलम कोच्ल बाट, आब याकर विरुद्धम व हमार राजानीतिक अधिकार व न्यायका लाग हुइने बा ।’

अग्रासन खबर

प्रतिक्रिया दिनुहोस्

भर्खरै प्रकासित