घोराही उपमहानगरपालिकाके नगरप्रमुख नरुलाल चौधरी एमालेके दशौं राष्ट्रिय महाधिवेशनमसे सर्वाधिक मत लान्क केन्द्रीय सदस्यम निर्वाचित हुइल बाट । नेकपा एमाले दांगके इन्चार्ज समेत रलक चौधरी १७५३ लान्क पहिला फ्यारा केन्द्रीय सदस्यम निर्वाचित हुइल । चौधरी यिहिसे आघ फे केन्द्रीय सदस्य रलह । तर, उ ब्याला चौधरी मनोनितम केन्द्रीय सदस्य बनल रलह ।
के हुइट नरुलाल चौधरी
घोराही उपमहानगरपालिका २ रामपुरम बाबा विलरा व डाइ मन्धरी चौधरीके छोट्का छावाके रुपम चौधरी वि.स.२०२४ वैशाख ३ गते जरम पैल । विद्यार्थी जीवनकालठेसे राजीतिक सुरुवाट कर्लक् चौधरी जिल्लाके एक कुशल, जुझारु व बौद्धिक नेताके रुपम चिन्जैठ । ओत्रकेल निहोख कम बोल्ना, तर चहनाकेल बोल्ना सरल मिजाशिलो, स्वभाव व हक्की नेताके रुपम फे परिचित बाट । २०७४ सालके स्थानीय तहके निर्वाचनम निर्वाचित होख घोराही उपमहानगरपालिकाके नगर प्रमुख पद जिम्मेवारीम काम कर्टि आइल बाट । नगरप्रमुखम लोकप्रिय मतले निर्वाचित हुइलक चौधरी राजनीतिम महा चट्टुर, कुटनीतिज्ञ व व्यस्थापनम बहुट सिपार नेताके रुपम चिन्जैठ ।
व्यवस्थापन संकायमसे एमबिए समके अध्ययन् कर्लक् चौधरी एक सफल व्यवसायी फे हुइट । आपन राजनीतिके करियरह सफल्ताके उचाइम पुगाइलाग आर्थिक स्रोत जुटाइकलाग मुर्घि पालन, माहुरी पालन, तरकारी खेति समेत कर्टि आइल बाट । विद्यार्थी राजनीतिमसे औपचारिक रुपम राजनीतिक सुरुवाट कर्लक चौधरी नेकपा एमालेक विभिन्न जनबर्गिय संगठनम आवद्ध हुइटी पार्टीके जिल्ला अध्यक्षठेसे राष्ट्रिय राजनीतिम पुगल एक सफल नेता हुइट ।
सरकारी जागिर छोरख राजनीतिम
विद्यार्थी राजनीतिसंगसगं चौधरी गाउँके जनता मावि बुका रामपुरम २ वर्षसम पह्रैना काम कर्ल । मस्टर्वा जागिर कर्टि कर्टि २०५२ सालम रेडियो नेपाल सुर्खेतम थारु भाषक समाचार पहर्ना कैख जागिर खाए गैल । तर जागिर खैटि खैटि २०५४ म स्थानिय निकायके चुनाव आइल । उ चुनावम साविक रामपुर गाविसम उठ्ना अटगर मनै निपाख किहिन उठैना कैख ब्यापक छलफल चलल् । पार्टीमसे नरुलाल चौधरी बाहेक रामपुरम किउ जिट निसेक्ना निष्कर्ष निक्रैटि उहाँन रेडियो नेपालके जागिरम राजिनाम डेख जिल्ला आइपर्ना ह्विप जारी गैलन । पार्टीके अर्जि अनुसार उहाँ रेडियो नेपालके जागिरम राजिनाम डेख २०५४ सालम हुइलक स्थानिय निकायके चुनावम साविक गाविसके अध्यक्षके पदम उम्मेद्वारी डेल । नाकटि चौधरी २०५४ के स्थानीय निकायके चुनाउम साविक रामपुर गाविसके अध्यक्ष सर्वाधिक मत आन्क जित्ल ।
जिल्लाभरके गाविस मध्ये सब्से मजा काम कर्लक कैख नमुना अध्यक्षके रुपम समेत स्थापित हुइल । गाविसके विकासठेसे लेक हरेक नेतृत्व कर्ताम सफल भूमिका खेल्लक कटि चौधरीके मजा चर्चा पैल । उह क्रमम चौधरी अखिल नेपाल किसान संघको केन्द्रीय सचिव समेत बन्ना अवसर पैल । नेकपा एमालेके सातौं महाधिवेशनम राष्ट्रि य प्रतिनिधि परिषद् सदस्य व २०६९ सालम एमाले दाङ जिल्ला कमिटिके अध्यक्षम निर्वाचित हुइल । साविक एमाले व माओवादी विच एकता हुइलपाछ नेपाल कम्युनिष्ट पार्टी नेकपाके केन्द्रीय सदस्यम मनोनित होख दाङ जिल्ला सह इन्चार्ज हुइटी आब नेकपा एमालेके इन्चार्जके जिम्मेवारीम रहल बाट । अनभव अनुभवले घोटगिलक चौधरी जनजिवीकासे जोर्ख दांगके समग्र विकासह आघ बह्राइ पर्ठा कना भिजन बोक्लक एक विकास प्रेमी नेता फे हुइट । घोराही उपमहानगरम कृत्रिम जलाशय मार्फत सिचाई, मच्छि पालन, पर्यटन व पानीक स्रोत बह्रैना योजनाह तिब्ररुपम आघ बह्रैल बाट । ओस्टक उपमहानगरके सक्कु वडाहके गाउँ गाउँम डगर (सडक) सञ्जाल, खानेपानी, विद्युत बिस्ता, गुणस्तरीय शिक्षा, बालमैत्री नगर बनैना अभियानम फे ओत्रह जोडतोडक साथ लागल बाट । थारु भाषाह सरकारी काममाजिक भाषा बनैना, उपमहानगरके प्रावि तहम थारु भाषम पठनपाठन करकलाग आघ बह्रैना नेपालके पहिला नगरपुमख पहे हुइट ।
