थारु गाउँम आम्हिनफे कहोंरे-कहोंरे बराभारी सझ्या खेन्वा डेख परठ् । खास कैख धान, लाही, गहु, मस्री काट्ख ढरकलाग् थारु समुदायक मनै अघट्टेसे आ-आपन गाउँम सझ्या खेन्वा बनाइल रलह । जब धान कट्ना हुइलाग त, तब गाउँक मनै आआपन धान ढरलक खेन्वा छिंग्वाल जाइट । अनि उह खेन्वम गाउँभरिक धान केर्वाके-केर्वा लगाख ढरठ । जत्रा डुर खेत्वा रलसेफे गाउँक मनै सक्कुज एकठो खेन्वम धान बोक्ना करठ । ५-६ बर्ष आघसम फे हरेक थारु गाउम एकठो सझ्या खेन्वा रह ।
जब खेन्वाभर धान भर । तब गाउँम क्याकर धान कत्रा हुइल कैख अड्कलबाजी सुरु ह्वाए । तर, आजकाल ओसिन निहो । जहाँ खेत्वा उहँ खेन्वा बनैना चलन सुरु हुइल बा । यी एक्ठो बाध्यता फे हुइ लागल । काजेकी अघट्टेसे थारु समुदायक मनै गाउँक विचम बराभारी सझ्या खेन्वा बनैल रलह । तर, आजकाल उ खेन्वाह राज्य तहसे ओगटना काम हुइटी बा । थारुन्ह्क सझ्या खेन्वा आपन मातहतम कहोंरे मन्दिर त कहोंरे वडा कार्यालय, सामुदायिक भवन, स्वास्थ्य चौकी बनैना नाउम थारुन्ह्क सझ्या खेन्वा मस्ना काम हुइटी बा । जौन कारणलेफे थारुहुक्र पाछक समयम जहाँ खेत्वा उहँ खेन्वा बनाइ भिर्लक् हुइट ।
जहाँ खेत्वा उहँ खेन्वाले सजिलो फे हुइल बा । ओस्टक आजकाल धान, कट्ना, बोक्ना मेसिन बेलसख कर्ना सुरु हुइल बा । जौन मजा फे हो । यदपी उ ब्याला साहा जत्रा कर्रा रह, ओत्रह रहारंगित फे रह । गाउँभरिक मनै मिल्ख काम करठ । कट्ना बोक्ना, डैना कामम मिल्ख निम्जाइट । बगाल -बगाल मिल्ख साहाके सक्कु काम उस्राइट । काजेकी उ ब्याला आब जसिन जमना निरह ।
धान कट्ना, बोक्ना डेनासम बेगारी करट । कबु क्याकर घर बेगारी जाइट त कबु आपन घर बलाईट । जैनाअैना मिल्ख बेगारीके माध्यमसे पालिक पाल्या बेगारी लेना ओ आ-आपन काम उसर्ना करट । असिख अगहन, पुस महिनासम् साहा ओराइट। बर्ढा, भैसले माला लाग-लाग धान डैना चलन रह । गाउँभिरक मनै मुर्घि बज्टिी खेन्वम धान डाए जाइठ । खेन्वा गिन्यौंर कौह्रा सुंगैना करट । पालिक पाल्या माला लग्ना, धान खिड्वरर्ना व कौह्रम बैस्ख आगि टप्ना भुजा खैना कैजिाए । मुर्घी बस्टिीकी धान डाए सुरु कर्लसे फे कल्वाजुनसम् बल्लतल्ल दुइतीन घाना निख्र । असिख महिना डिनसम थारुहुक्र आपन अनाज घरम आनठ ।
तर, आब पहिलासे सजिला हुइल बा । ओसिन कर्रा जमाना नै हो । धान कट्ना बोक्ना, डैनाम बेगारी जैना व लेना कम हुइल बा । खास कैख पाछक समयम अइलक आधुनिक प्रविधिके विकासले किसानहुकन पहिलासे बहुट सजिला हुइल बा । धान कट्ना काम आब मेसिनले कर लग्ल । ओस्टक जहाँ खेत्वा उह धान बोक्ना व उहजो मेसिन (थ्रेसर) लगाख धान डाए भिरल बाट । यिहले फे आब किसानहुकन बहुट सजिला हुइल बाटन । कम समयम बहुट काम व हाली काम उसर्ना हुइलकओर्से फे आब थारु समुदायक मनै फे बेगारी लेना व जैना छोर्ख आधुनिक प्रविधि बेलस्ख आपन साहा उस्रैटि आइल बाट ।
आब प्राय जसो किसानहुक्र यिह प्रविधिले आपन खेतिपाटी कहि या साहा उसार सेक्ल । साहा ओराख आब थारु गाउँ गाउँम पेन्ड्या खाइ सुरु करल बाट । पहिला पुस, माघओंर खैना पेन्ड्या आजकाल कार्तिकम त किउ अगहनम जो खइना चलन होगिल । बहुट ठाउँमा त पेन्ड्या खैना चलन जो हेरागिल बा । यदपी कहोंरे कहोंरे भर पेन्ड्या खइना चलन पलि बा । थारु समुदायक मनै बर्षडिनके लाग अनाज घरम अइलसे खुशीयालीके रुपम आपन सक्कु कबिला (इष्टमित्र) हुकन बलाख पेण्ड्या खैना कर्टि अइलक थारु अगुवाहुक्र बटोइठ ।
थारु समुदायम घरम डुचार पैसा ह्वाए या निह्वाए तर, घरम अनाजपानीले भर कना मान्यता बा । उहमार थारुन्हक घरम आब पैस्ना हो कलसे बह्रिठेसे कोन्टीसम धानक बखारी बनाल डेख पर्ठा । ज्याहोस थारु औरजहनके भर निपर्ना आपन खाइलाग आपन्हे सामा कर्ना पहिलासे चल्ति अइलक चलन बा । । कृर्षिम आत्मनिर्भर रलक थारु समुदाय जस्तक काम काज कर्ठ ओस्टक टैटिह्वार फे मनैठ । यी टिह्वार फे बर्षडिनके खैनापिना घरम अइलक खुशीयालेके अवसरम थारु समुदायक मनै पेन्ड्या मनैना कर्ठ । यी अवसरम सक्कु मैगर कबिलाहुकन हमार टरफसे फे पेण्ड्या पर्वके मैगर शुभकामना ।
जय गुर्वावा !
(गैइल अठ्वार अगहन ११ गतेक लौव अग्रासनम प्रकासित सम्पादकीय)
