कल्पना चौधरी
थारु भाषा, कला, संस्कृतिके विकास कर्नामा लौव अग्रसान साप्ताहिकके अग्रणी भूमिका रलक एक कार्यक्रमम बोल्ना बक्तहुक्र जोड डिहल बाट । लौव अग्रसान साप्ताहिकके १५ बरसम प्रवेश करल अवसरमा घोराहीम आयोजना कैगिलक पोष्टाके १४ औं बार्षिकोत्सवके कार्यक्रमम बोल्ना बक्ताहुक्र असिन बातम जोड डेलक् हुइट ।
लौव अग्रासन साप्ताहिकके थारु भाषा, कला, संस्कृतिके संरक्षण व प्रवद्धन कर्नामा बराभारी योगदान रलक प्रेस काउन्सिल नेपालके सदस्य शरद अधिकारी बटोइल । कार्यक्रमकके बर्का पहुना समेत रलक अधिकारी थारु भाषा कला, संस्कृति बचाइलाग फे लौव अग्रासनह निरन्तरता डिह पर्ना बात बटोइल । अग्रासन रहि कलसेकेल थारु भाषा, कला, संस्कृतिके विकास हुइना हुइलक् ओर्से अग्रासन थप बल्गर बनाख लैजाइ पर्ना बातम जाड्डेल । प्रेस काउन्सिल नेपालसे भाषाभाषिक पत्रिकाहन विशेष प्रोत्सहन कैख सहयोग कर्टि अइलक बटोटी स्थानीय तहमसे फे विशेष सहयोग कर सेक्लसे स्थानीय भाषा, कला, संस्कति बचैनाम थप टेवा पुग्ना उहाँके बटोइल ।
ओस्टक पोष्टाके सल्लाहकार बालकृष्ण चौधरी यी प्रतिस्पर्धाके जमानम फे थारु भाषम पोष्टा प्रकाशन कैख यिहासम्म अइना बराभारी उपलब्धी हुइलक बटोइल । थारु भाषा, कला, संस्कृति लोप हुइटी रहल ब्यालम लौव अग्रासन मार्फत थारु भाषा, कला, संस्कृतिके उजागर कर्टि याकर संरक्षण व प्रवद्र्धन कर्नामा बहुट भूमिका रलक चर्चा करल रलह । कार्यक्रमके ड्वासर बर पहुना समेत रलक चौधरी थारु समुदायके उत्थानम फे अग्रासनके भूमिका रलक बटोइटी आब आर्थिक सशक्तीकरणम जोड डिह पर्ना बातम जोड डिहल रलह ।
पोष्टाके प्रधान सम्पादक केवी चौधरीके अध्यक्षताम हुइलक कार्यक्रमम थारु कल्याणकारिणीसभा दाङके अध्यक्ष भुवन चौधरी, प्रेस चौतारी नेपालके केन्द्रीय उपाध्यक्ष सविन प्रियासन, नेपाल पत्रकार महासंघ दाङके अध्यक्ष दुर्गालाल केसी, उपाध्यक्ष सन्तोष सुवेदी, सभाके सचिव प्रकाश चौधरी व प्रेस चौतारी नेपाल दाङके अध्यक्ष इन्द्र डिसी लगायत शुभकामना व्यक्त कर्लरलह ।
पोष्टाके प्रकाशक सम्पादक सन्तोष दहितके स्वागत मन्तव्यसे शुरु हुइलक् कार्यक्रमम सर्जकहुक्र लब्लिन क्यानभास, राजकुमार कान्छा, हिमलाल चौधरी, कल्पना चौधरी लगायत रचना प्रस्तुत करल रलह कलसे कार्यक्रमके सहजिकरण पोष्टाके समाचारदाता नवीन चौधरी करल रलह ।
