
अस्टक घोराही उपमहानगरपालिका वडा नं. १७ गुलरियाके रामप्रसाद चौधरी ३९ औं फ्यारा मटावाँ चयन हुइल बाट । उहाँ २०४३ सालठेसे मटावाँ चलैटी आइल बाट । स्थानीय महेन्द्र चौधरी रामप्रसादह फेसे मटावाँ चयन कर्लक जनैल । ‘रामप्रसाद नम्मा समयसे गाउँक मटावाँ चलैटी आइलबाट, महेन्द्र कल, ‘उहओर्से यी वर्ष फेसे उहाँह जो हम्र सर्वसम्मतरुपम मटावाँ चयन कर्लीं ।’रामप्रसादफे ३९ औं पटक मटावाँम चयन हुइलक बटोइल । ‘यी वर्ष नेतृत्व हस्तान्तरण कर्ना सोचम रनहुँ, तर गाउँक मनै निमन्ल, रामप्रसाद कल, ‘अप्न जो गाउ चलाडिह परल, अप्नक बहुट अनुभव फे बा, कैख कल, उहमार मै फेसे मटावाँके जिम्मेवारी लेनु ।’ रामप्रसादसे आघ उहाँके काका ऋषिराम चौधरी मटावाँ रलह । उहिसे आघ रामप्रसादके बकाबाबा मटावाँ रलह ।
अस्टक दंगीशरण गाउँपालिका ३ हेकुलीके नारायण चौधरीफे फेसे मटावाँम दोह्रैल बाट । नारायणफे अखिस २० औं फ्यारा मटावाँम चुन्गिलक जनैल । यिहिसे आघ उहाँके बाबा धरणिधर मटावाँ रलह । धरणीधर झण्डै ६ दशकसे ढ्यार मटावाँ चलैल रलह । उहिसे आघ नारायणके बाज्या सीताराम चौधरी मटावाँ चलैल रलह ।
ओस्टक दंगीशरण ३ रावतगाउँकाके लीलामणि चौधरीफे फेसे मटावाँ चयन हुइल बाट । उहाँ आब १७ औं पटक मटावाँम चुन्गिलक हुइट । यिहिसे आघ लीलामणिके बाबा रामशरण चौधरी मटावाँ हंक्टी आइल रलह । उहिसे आघ उहाँके बाज्या नम्मा समयसम मटावाँ चलैलक लीलामणि जनैल ।
चन्द्रप्रसाद, रामप्रसाद, नारायण व लीलामणि त उदाहरणके हुइट । असिनख नम्मा समयसम मटावाँ चलैटी अइलक अगुवाहुक्र थारु गाउँम बहुट बा । उहाँम एक्क परिवारभिट्टरके सदस्यहुक्र एक शताब्दीसे ढ्यार समयसम मटावाँ चलइटी आइल पागिल बा । चन्द्रप्रसाद चौधरीके अनुसार गाउँलहुक्र मटावाँ चलाइलक निमन्ना कारणले आपन्हे नम्मा समयसम मटावाँ चलाइ पर्टी अइलक बटोइल । ‘थारु समुदायके प्रथाजनित संस्था हो, याकर संरक्षण व प्रवद्र्धनके लाग फे आपन्हे फे बाध्यतावश मटावाँ चलाइ परल बा । चन्द्रप्रसाद कल, ‘यदि गाउँलेहुक्र मटावाँके नेतृत्व लिह मनही कलसे जत्रा ब्याला फे मै नेतृत्व हस्तान्तरण कर्ना तयार बाटु ।’
दाङम करिव साढे पाँच सय मटावाँ बाट । उ मध्ये आबसम लमही ८ म केल एकठो महिला मटावाँ चयन हुइल बाटी । गैल बष चिट्ठा पर्ख मटावाँम चुन्गिलक सिता चौधरी मजा काम कर्लक कैख आब यी बर्षके लाग फे सीताह जो सर्वसम्मतम मटावाँ चन्लक उहाँ बटोइली । दाङम सब्से ढ्यार मटावाँ घोराहीम दुई सयसे ढ्यार बाट कलसे तुलसीपुरम एक सय ५० दंगीशरण व अन्य पालिकाम फे मटावाके बहुट संख्या रलक मटावाँ महासंघ दाङका अध्यक्ष चन्द्रप्रसाद चौधरी जनैल । परम्पराठेसे चल्टि अइलक मटावाँ प्रथाम महिलाके प्रतिनिधित्व न्यून रलक कटि उहिह बह्राइ पर्ना थारु साहित्य प्रतिष्ठानके कार्यकारी निर्देशक डा. कृष्णराज सर्वहरी बटोइल ।