घोराही उपमहानगरपालिकाके नगर प्रमुख नरुलाल चौधरी थारु भाषा थारुन्हक् पहिचान हुइलक् बटोइल बाट ।
लौव अग्रासन साप्ताहिकके आयोजनाम शनिच्रक डिन्वा घोराहीम हुइलक् थारु भाषाके वर्तमान अवस्था विषयक अन्तक्र्रिया कार्यक्रमह सम्बोधन कर्टि चौधरी असिन बातम जोड डेलक हुइट । ‘आब थारु भाषा बिग्र लागल, अशुद्ध हुइल । बोलीचालीम फे कमि आइल बा, उहाँकल– ‘भाषा हमार जीवन हो । यिह भाषा हमन बाँच सिखाइल, ब्वाल सिखाइल, उहओर्से आपन भाषा संरक्षणम हम्र लाग पर्ठा ।’
कार्यक्रमके बर्का पहुना समेत रलक नगरप्रमुख चौधरी घोराही उपमहानगरपालिका थारु भाषाह सरकारी कामकाजके भाषा बनाख थारु भाषाम पठनपाठनका व्यवस्था मिलैलक् ओर्से थारु भाषाह जीवन्त बनैनाम सहयोग पुग्ना बटोइल । भाषाह जटिल बनाख गइलसेफे सरल बनाख जीवन्त बनाइ पर्ना जरुर रलक उहाँके कहाइ रलहिन ।
‘भाषा थारुनके हुइलसेफे सम्पत्ति राज्यके हो’– कार्यपत्र प्रस्तुत कर्टि थारु लेखक संघके केन्द्रीय अध्यक्ष डा. कृष्णराज सर्वहारी कल– ‘थारु भाषाके संरक्षण व प्रवद्र्धनके काम फे राज्यके हो ।’ उहाँ घोराही उपमहानगर लगायतके कतिपय स्थानीय सरकारसे थारु भाषा संरक्षणम काम शुरु कर्लसे फे जत्रा हुइ पर्ना हो ओत्रा काम स्थानीय सरकारसे निकर्लक् उहाँ चिन्ता व्यक्त कर्ल ।
थारु समुदाय स्वम आपन्हे थारु भाषा बिसैटिै गैलक बटोइटी डा. सर्वहारी भाषा संरक्षणक लाग सक्कुज थारु भाषम ब्वाल पर्ना बटोइल । जुनसुकै ठाउँम ब्वालबेर फे थारु भाषा व शव्दके परिकल्पना कर्टि अभिव्यक्तिम फे आइपर्ना कटि थारु भाषा सरकारी कामकाजके भाषाके रुपमा विकास करपर्ना जरुरी रलक बटोइल ।
थारु भाषा संरक्षणके लाग विद्यालयम पठनपाठन हुइपर्ना, थारु भाषाके सञ्चार माध्यमके संरक्षण करपर्र्ना, विद्यालय, विश्वविद्यालयम थारु भाषाम साहित्यिक गतिविधि हुइपर्ना बटोइल । ओस्टक थारु कल्याणकारिणीसभा, थारु लेखक, थारु विद्यार्थीहुक्र स्थानीय सरकारह झकझक्यइना काम करपर्ना आवश्यक रलक बटोइल ।
कार्यक्रमम कार्यपत्र उप्पर टिप्पणी कर्टि नेपाल संस्कृत विश्वविद्यालय राष्ट्रिय सांस्कृतिक अनुसन्धान केन्द्रके निर्देशक डा. जर्मन चौधरी जनसंख्याके हिसावले थारु ढेर रलसे फे थारुभाषी कम हुइटी गइलक चिन्ता व्यक्त कर्ल । थारु भाषाम पठन पाठन हुइलसे भाषाह जीवन्त बनाइ सेक्ना बटोइटी यिहिन स्थानीय सरकारक भूमिका बह्राइ पर्ना बातम जोर डेल । थारु भाषा संरक्षण व प्रवद्र्धनक लाग थारु गतिविधि करपर्ना, सरकारसे जोर्क काम करपर्ना, छुट्ट संयन्त्र आवश्यक रलक बटोइल ।
लौव अग्रासन साप्ताहिकके प्रधान सम्पादक कुलवीर चौधरीके अध्यक्षताम हुइलक् कार्यक्रमम थारु कल्याणकारिणीसभाके केन्द्रीय कोषाध्यक्ष चुर्णबहादुर चौधरी, तुलसीपुर उपमहानगरपालिकाके उपप्रमुख स्यानी चौधरी, थारु कल्याणकारिणीसभाके सल्लाहकार भुवन चौधरी, सञ्चारकर्मी छविला कोपिला, शिक्षाविद कुछटनारायण चौधरी, बालगोविन्द चौधरी लगायत बोल्ल रलह । पत्रिकाके प्रकाशक सम्पादक सन्तोष दहितके स्वागत मन्तव्यसे सुरु हुइलक कार्यक्रमके सहजिकरण समाचारदाता कल्पना चौधरी कर्लरलही ।
