घोराही, २६ अगहन । थारु कल्याणकारीणी सभा दाङ देउखरके आयोजनाम घोराहीम बृहत माघ महोत्सव हुइना हुइल बा ।
थारु समुदायके बर्का टिउह्वारके माघके अवसरम अइना पुष २२, २३ व २४ गते माघ महोत्सव हुइना हुइलक् हो । थारु कल्याण कारीणी सभा दाङके अध्यक्ष भुवन चौधरीके अध्यक्षताम यिह अठ्वार शनिच्रक डिन्वा बैस्लक बैठकमसे घोराहीम माघ महोत्सव कर्ना निर्णय कर्लक् हो ।
तीन दिनसम हुइना महोत्सवह भब्य व सभ्य बनाइलाग मेरमेह्रिक समितिफे बनागिल बा । वैठकम सभाक अध्यक्ष भुवन चौधरीके संयोजकत्वम ५१ सदस्यीय महोत्सव मुलक आयोजक समिति बनागिल बा । ओस्टक भुवन चौधरीके संयोजकत्वम आर्थिक समिति फे बनागिल बा । आर्थिक समितिके सदस्यम केबी चौधरी, प्रकाश चौधरी, अनिल चौधरी, अशोक चौधरी, सन्तोष दहित शोभाराम चौधरी लगायत रहल बाट ।
ओस्टक सन्तोष दहितके संयोजकत्वम पाँच सदस्यीय प्रचारप्रसार समिति बनागिल बा । ज्याकर सदस्यम नविन चौधरी, सविता चौधरी, सवि चौधरी, नगेन्द्र चौधरी रहल बाट । ओसहक लक्ष्मिमान चौधरीके सयोजकत्वम सांस्कृतिक समिति, अशोक चौधरीके संयोजकत्वम यातायात समिति, बसन्ती चौधरीके संयोजकत्वम स्वागत सत्कार समिति गठन कैगिल बा । अस्टक लौटन चौधरीके संयोजकत्वम मञ्च व्यवस्थापन समिति, प्रकाश चौधरीके संयोजकत्वम सरसफाई समिति व रेशम धरकटुवाक संयोजकत्वम युवा परिचालन समिति गठन कैगिलक् सभाके सचिव प्रकाश चौधरी जनैल ।
जिल्ला समन्वय समितिक अङनम हुइना तीन डिन्या माघ महोत्सवम दाङक सक्कु स्थानिय तहके मघौटा नाच लगायत मेरमेह्रिक थारु नाच डेखैना कार्यक्रम रलक उहाँ जनैल । ओस्टक महोत्सवम थारु परिकार, तथा थारु समुदायके हस्तकला, थारु भाषाके मेरमेह्रिक पोस्टा लगायत प्रर्दशनीके लाग ढर्ना तयारी रलक सभाके अध्यक्ष भुवन चौधरी जनैल । थारु समुदायके उदगम जिल्लाके रुपम चिन्जैगक दाङके थारु समुदायके मौलिक कला, सस्कृति विकास कर्नाम थप सहयोग पुगैना उद्देश्यले माघ महोत्सवके आयोजना हुइ लग्लक उहाँ बटोइल ।
जिल्लाके आर्थिक, सामाजिक, साँस्कृतिक रुपान्तरणकेलाग यी माघ महोत्सव आवश्यक हुइलकओर्से विगत नम्मा समयसे थारु कल्याणकारिणी सभाके आयोजनाम माघ महोत्सव आयोजना कैगिलक सभाके अध्यक्ष चौधरी बटोइल ।
