घोराही उपमहानगरपालिकाह लैंगिक हिंसा नियन्त्रित नगर घोषणा कैगिल बा । बैफेक डिन्वा उपमहानगरपालिकाके ४८ औं नगर स्थापना दिवसक अवसरम लैंगिक हिंसा नियन्त्रित नगर घोषणा कैगिल हो ।
लुम्बिनी प्रदेशके मुख्यमन्त्री चेतनारायण आचार्य लैंगिक हिंसा नियन्त्रित नगर घोषणा पत्र पहर्ख लैंगिक हिंसा नियन्त्रित नगर घोषणा कर्लरलह । कार्यक्रमह सम्बोधन कर्टि मुख्यमन्त्री आचार्य घोराहीह लैंगिक हिंसा नियन्त्रित नगर घोषणा लुम्बिनी प्रदेशम नमुनायोग्य उपलब्धि हुइलक बटोइल । मुख्यमन्त्री आचार्य मानवीय, सामाजिक तथा भौतिक विकासका क्षेत्रम उल्लेखनीय परिवर्तन अइलफे बटोइल । जनताक जीवनस्तर उठैना काम हुइल बा, उहाँ कल, यी सक्कु साझा प्रयत्न व कुशल नेतृत्वके परिणाम हो ।
घोराहीसे मानव विकास सूचकक आधारम बालमैत्री व साक्षर नगरक घोषणा कैसेक्लक उल्लेख कर्टि उहाँ संघीय व प्रदेश सरकारसे ट्वाकल सूचक कर्टि लैङ्गिक हिंसा नियन्त्रित नगर घोषणा हुइना सिंगो देश व प्रदेशक लाग नमुनायोग्य काम हुइलक बटोइल । आब कौनो फे घरपरिवारम लैङ्गिक हिंसा निहुइडिक्लाग प्रतिबद्धता सक्कुज जनास्याकल बाट, उहाँ कल, यिहना दिगोपनासम लैजाइलाग सक्कुज लागपर्ठा ।
कार्यक्रमम घोराही उपमहानगरपालिकाके प्रमुख नरुलाल चौधरी लैङ्गिक हिंसा नियन्त्रित नगर घोषणा सम्बन्धी कार्यविधि २०८१ अनुसार ३२ ठो सूचक पूरा कैख घोषणा कर्लक जानकारी डेल । पाछक एक वर्षम घोराहीम जम्म २२ ठोकेल लैङ्गिक हिंसाका घटना दर्ता हुइलक व जनसंख्याक आधारमा यी संख्या ०.०१ प्रतिशतकेल हो ।
उपमहानगरपालिकाके उपप्रमुख हुमा डिसीके स्वागत मन्तव्यसे सुरू हुइलक् कार्यक्रमम जिल्ला समन्वय समितिके प्रमुख नित्यान्द शर्मा, प्रमुख जिल्ला अधिकारी विश्वप्रकास अर्याल, घोराही उपमहानगरपालिकाके नगर प्रवक्ता एवं सामाजिक विकास शाखाके प्रमुख राममणि पाण्डेय लगायत बोल्ल रलह । घोराही उपमहानगरपालिकाके नगरप्रमुख नरूलाल चौधरीके अध्यक्षताम हुइलक कार्यक्रमम लैंगिक हिंसा नियन्त्रित नगर घोषणाम सहयोग पुगैना उपमहानगरपालिका बिभिन्न महाशाखा, शाखा, संघसंस्था, मिडिया व पत्रकारहुकन सम्मान कैगिलरह ।
