थारु कल्याणकारिणी सभाके २३ औं राष्ट्रिय महाधिवेशनसे लौव कार्यसमिति चुन्गिल बा । सभाके महामन्त्रीम बर्दियाके मिनराज चौधरी निर्विरोध निर्वाचित हुईल बाट । महमन्त्रीम लौव निर्वाचित चौधरीसे थाकसके आगामी कार्ययोजना, भाविरणनीति लगायत समसामयिक विषयम लौव अग्रासन साप्ताहिकके सम्पादक सन्तोष दहितसे करल बातचिट प्रस्तुत बा ।

सब्से पहिला त महामन्त्रीम निर्विरोध निर्वाचित हुईलकम अप्नह मैगर बधाई सहित सफल कार्यकालक शुभकामना बा ।
देशभरीक सक्कु थारुन्हक साथ, सहयोग ओ समर्थनसे थारु कल्याणकारिणी सभाक महामन्त्री पदम निर्विरोध निर्वाचित कैक जिम्मेवारी डेहल बट ओकर लाग अप्न सहित सक्कुजहन हार्दिक मैगर धन्यवाद बा ।

महामन्त्री जसिन गरिमामय जिम्मेवारी पदम निर्विरोध हुईल पाछ कसिन महसुस हुइटी बा ?
थारुन्हक राष्ट्रिय साझा संस्था थारु कल्याणकारिणी सभाक महामन्त्रीम निर्विरोध निर्वाचित हुईल पाछ कन्ध्यम थप जिम्मेवारी, कार्यभार ओ दायित्व बह्रल बा । सात दशक लम्मा गौरवमय ईतिहास बोकल सभाके उद्देश्य ओ थारुन्हक हक, अधिकारक लाग उठाईल माग मुद्दाह पुरा करैना संघर्षक अभियानम बहुट मेरिक चुनौती, सम्भावना, अवसर फेर मिलल बा । यिहीह आत्मसात कैक सभाह सही डगरम नेङगैम कहना विश्वास सहित बहुट जिम्मेवारी बोध कराईल बा ।

थाकसह सहि डगरम नेङगैम त कलि । तर, पाछक समयम थाकसह राजनीतिक भ¥याङ्क रुपम प्रयोग हुईटी बा कहना टिकाटिप्पणी हुईटी बा नी । यी बातह अप्न कसिक लेल बाटी ?
थारु कल्याणकारिणी सभा थारुन्हक हक अधिकारक सहित समग्र विकासक लाग जोरदारसे माग मुद्दा उठैती संघर्ष कर्ना विशुद्ध सामाजिक संस्था हो । सभा अभिनसम् कौनो दल, नेता विशेषक गुनगान, पृष्ठपोषण कर्ना ओ कौनो दलक विरोध वा निषेध कर्ना काम अभिनसम निर्कल हो । अप्नक कहअस थाकस अब्ब राजनीतिक भ¥याङक रुपम प्रयोग फे नैहुईल हो यी गलत बात् हो ।
थरुहट थारुवान संयुक्त संघर्ष समितिसे आन्दोलन शुरु करबेर हेरसेक्बी सक्कु दलम रहल थारु नेतन एक ठाउँम लान्क संघर्ष कर्ती आईटा । तर सत्य बाट पाछक हरेक महाधिवेशनक ब्याला राजनीतिक दलहुँक्र आ(आपन दल, गुटम आस्था बिचार बोकल नेतृत्व ह आघ सारक लाग विधि विधान, पक्रियाह पख्वा लगाक बरा सक्रिय हुइटी चलखेल, अनावश्यक हस्तक्षेप, दबाब डेहना, काम कर्टी आईल बट । थाकसक लाग यी दुर्भाय हो । असिन राजनीतिक हस्तक्षेप निषेध हुईना जरुरी बा ।

तर, आर्थिक, सामाजिक ओ सांस्कृतिक माग मुद्दाह पान्जर लगाक थरुहट राजनीतिक मुद्दाम केल केन्द्रीत हुईल कना जनगुनासो आईटा । का यी बाट जात्तिसे हो ?
आर्थिक, सामाजिक ओ सांस्कृतिक माग मुद्दा पान्जर लगाक राजनीतिक मुद्दाम केल केन्द्रीत हुईल कहना बाट फे गलत हो । यी सवालम हमार बुझ्ना ओ बुझैनाम फरक बात केल हो । थारुन्हक सामाजिक, सांस्कृति, शैक्षिक, आर्थिक सहित बृहत्तर हितक सवाल राजनीतिक अधिकार से जोरल बात हो । जबसम्म थारुन्हक यी सवाल राजनीतिक माग मुद्दा निबनी वा राजनीतिक रुपम सम्बोधन होक संविधान, ऐन, कानुन, नीति, नियम बन्क कार्यान्वयन हुई तब न हम्र यी पक्षम विकासक अनुभूती करपैबी । उहमार यी सवाल उठाईबेर कुछ मनैन राजनीति मुद्दा केल उठाईल हस लागठुहीन । ओसिक जिन सोंच्बी कहना आग्रह बा । थाकस संस्कृति संरक्षण संवद्र्धन प्रवद्र्धन कर्नासे लेक थारु समाजम रहल सामाजिक बिकृति, बिसंगती, कुरिती हटैटी, कृषि पेशाम रहल थारुनक जीवन स्तरम सुधार कर्टी आर्थिक समृद्धि, रोजगार, आरक्षण, प्रतिनिधित्व, न्याय, समानता, अधिकारक लाग निरन्तर माग मुद्दा उठैटी काम कर्टी आईल बा ।

त, यी संस्थाह सक्कु थारुन्ह्क साझा संस्था हो कना मान्याता बनाईकलाग आब अप्नक भूमिका का रही ?
थारु कल्याणकारिणी सभा सक्कु थारुन्हक राष्ट्रिय साझा संस्था हो यम्न दुई मत नैहो । टहुपर थाकस सक्कु थारुनहक, आस्था, विश्वास, भरोसाक घर बनाईक बहुट कुछ बदल पर्ना बा । सबसे पहिल थाकसक नेतृत्व पंक्तिम पुरान सोच, ढुलमुले, सुस्त कार्यशैली, प्रवृत्ति ओ यथास्थितिवाद से उप्पर उठक लोकतान्त्रिक कार्यशैली बनैटी सक्रियता लान पर्ना बा ।

डोसर बात थाकसके संस्थागत सुधारम केन्द्रीय घर बनैना, विधान संशोधन, आर्थिक प्रशासनीक लागतय बहुट मेरिक विनियमावली बनाक सभाक छाती अभिन फराक बनैटी जिल्लागत प्रतिनिधित्व, विदेश शाखा, भातृ संस्थाके अधिकार, स्थान, भूमिका, कर्तव्य, दायीत्व बह्रैटी सक्कुहन समेट पर्ना बा ।
तेसर बात सभाके उद्देश्य ओ समय सापेक्ष उठाईल माग मुद्दा अनुसार वार्षिक नीति, कार्यक्रम, योजना, बजेट बनाक प्रभावकारी कार्यान्वयनम सक्रिय होक लाग पर्ना जरुरी बा । यीह आवश्यकता पुरा करकलाग “हमार थाकस, हमार गौरब” नारा सहित मोर सक्रिय भूमिका रही ।

अप्न आपन कार्यकालम थाकस ह कसिक आघ लैजिना सोच ओ योजना बनैल बटी ?
हमार कार्यकालम सबसे पहिल थारु कल्याणकारिणी सभाको साखह आरु ढिउर बह्राईक लाग संस्थागत ओ नेतृत्वपंक्तिम सुधार कर्ना, सभाके आन्तरिक ओ बाहरक कार्यगतिविधीम ब्यापक सुधार कैक नीति, योजना, कार्यक्रम, बजेट बनैना, थरुहट-थारुवान आन्दोलनक माग मुद्दा, सहमती सम्झौता कार्यान्वयनक लाग सशक्त उठैना, थरुहट नेता, अभियन्ता हुँकहन लगाई झुठ मुद्दा खारेज-फिर्ता, सहीद परिवारन्क लाग रोजगार, घाइतेनक औषधी उपचार, बिस्थापित हुँकहन राहत ओ क्षतिपुर्ति डिहोइना, थरुहट शहीद स्मृति छात्रबृत्ति अक्षयकोष बनैना, सभाके माग मुद्दा से मिल्ना और संघ संस्था हुँकहन्से समन्वय, सहकार्य, मोर्चाबन्दी सहित कार्यगत एकता कैक सशक्त संघर्ष कर्ना योजना बा ।

ओस्टहक थाकसके केन्द्रीय कार्यालय (घर) बनैना अभियान शुरु कर्ना, कार्यालय सूचना प्रविधि मैत्री वइभसाइट, थाकस एप, फेसबुक पेज, इन्टरनेट ईमेल से सक्कुहन जोर्ना, संस्थापकसे लेक हालसम्मके अध्यक्ष हुँकहन्क तस्वीर व्यानरम ढर्ना, पूर्व पदाधिकारी सदस्यन उच्च मानसम्मान सहित कदर कर्ना, थाकसके विगतसे लेक हालसम्मके अभिलेख बनैना, आजिवन, मानार्थ, साधारण सदस्य, केन्द्रीय पार्षदन, जिल्ला सभापतिनक छुट्टछुट्ट अभिलेख बनैना, मेची महाकाली थरुहट जन जागरण अभियान संचानल कर्ना योजना कार्यक्रम बनैल बटी ।

अस्टक थारु यूवा विद्यार्थीनक लाग रोजगार, भर्ना, छात्रबास, छात्रबृत्ति ओ अवसरक पहल कर्ना, थारु किसानके हक हित ओ आधुनिक कृषि प्रविधिमा जोर, मलखाद, उन्नत बिया बालर, प्रविधि यान्त्रिकरणम सहुलिय सहित समुचित बजार मूल्य निर्धारणक लागि पहल कर्ना, संस्कृति संरक्षण संवद्र्धनको अभियान चलाउदै संस्कति, धर्म, लोक कला, साहित्य, शिक्षा, आदि लाई समेटर बिस्तृतरुपम थारु प्रोफाइल बनैना, भातृ संस्था बिस्तार ओ गठन म जोर डेहना, थारुन्म केल लग्ना सिकलसेल एनीमिया रोगके चेकजाँच ओ बिरुवा बुट्टी व्यवस्था मिलाइक लाग सरकारम पहल कर्ना, थारुन्हक परम्परागत प्रथा बरघर/भलमन्सा/मटावाँ-ककन्दार/गहदार/चौधरीया प्रणालीके बारेम स्थानीय, प्रदेश तथा संघीय सरकारमा ऐन कानुन निर्माण बनाक प्रभावकारी कार्यान्वयनक लाग पहल कर्ना, संघीय तथा प्रदेश निजामती, प्रहरी, सेना, स्वास्थ्य, शिक्षा, लोकसेवा लगायत सक्कु तहके सरकारी सेवाम थारुन्हक जनसंख्याके आधारम पहुँच प्रतिनिधित्व सुनिश्चित्तताके लागि सम्मानित सर्वोच्च अदालतके फैसला अनुसार कार्यान्वयनम दबाबकारी भूमिका खेल्ना सोंच सहित योजना बनैल बटी ।

ओरौनीम कुछ कह पर्ना बाट बाकी ?
थाकसम आमूल परिवर्तन कर पर्ना बा । सक्कु थारुन्हक राष्टिूय साझा हो कना मान्यताह अभिन सार्थक बनैटी सक्कु थारुन्हक आस्था, विश्वास भरोसा योग्य बनाइक पर्ना बा । हमार बनाईल नीति, कार्यक्रम, योजना अनुसार प्रभावकारी कार्यान्वयन करक लाग सक्कुजे तन मन धन लगाक सक्रिय होक साथ, सहयोग समर्थन डेहटी डट्क लाग डेहबी कहना अरजी करटु ।