लुम्बिनी प्रदेश सरकारके क्याबिनेटम थारु समुदायसे सीता चौधरी मन्त्री बनल बाटी । आम्हिनसम् उहाँ थारु महिलामसे पहिला मन्त्री बनल हुइटी । मुख्यमन्त्री चेतनारायण आचार्यके नेतृत्वम बन्लक् लौव सरकारम उहाँ नेकपा एमालेके कोटामसे उर्जा, जलश्रोत तथा सिंचाइमन्त्री बन्लक् हुइटी ।
थारू महिला आरक्षण कोटामसे समानुपातिक प्रदेश सभा सदस्य बन्लक् चौधरी नेकपा एमाले लुम्बिनी प्रदेश कमिटिके सदस्य फे हुइटी । बेल्वा बञ्जाडी किसान आन्दोलनकेके विरासत बोक्लक चौधरी घोराही उपमहानगरपालिका वडा नं. ३ बेलुवाके बाबा चन्द्रलाल चौधरी व डाई फूलमानी चाौधरीके सन्ल्ही छाइके रुपम जरम पैली ।
छोटिअमसे चुलबुल्या(चलाख) रलक् चौधरी २०५८ सालमसे भुमिगत आन्दोलनमसे राजनीतिक सुरुवाट कर्ली । हरके बातम महासिपार चौधरी राजनीतिक, कुटनिटिकम फे ओत्रह चट्टुर बाटी ।
राजनीतिके डौरानम नेङिटी रहल ब्याला २०६३ सालम दाङके एक बौन्हासे भ्वाज कर्लि । घोराही उपमहानगरपालिका वडा नं. १५ म बैस्ना युवा नेता प्रमोद शर्मासे चौधरीके जनवादी भ्वाज हुइलिन ।
भ्वाजपाछ फे आपन राजनीतिह निरन्तर आघ बह्रैटी गैलक् चौधरी २०७८ चैत १० गते आपन गोस्सेसे एमालेम समाहित हुइली । नेकपा एमालेम समाहित हुइलपाछ फे नेता कार्यकताहुकनके विचम छोटी समयम आपनह स्थापित कर्ली । अनुशासीत, भद्र नेताके रुपम समेत चिन्जैना चौधरी २०७४ के स्थानीय तहके चुनाउम नेकपा माओवादी केन्द्रके टरफसे उपमेयरम उठल रलही । चुनाउम हर्लसे (पराजित) फे चौधरी राजनीतिम आपनह झन जनतनके बिचम बल्गर स्थापित कर्ली ।
कसिख बन्लि मन्त्री
वि.सं. २०७९ सालके प्रदेश सभाके चुनाउपाछ लुम्बिनी प्रदेशम एमाले तीन फ्यारा सरकारम सहभागी हुइल बा । यिहिसे आघ एमालेमसे मन्त्रीक लाईनम दाङके प्रतिनिधित्व निरह । प्रदेश
राजधानी समेत रलक जिल्लाके टरफसे प्रतिनिधित्व कराइबेर एमालेके टरफसे सीताके नाउ आघ सार्गिल । थारुन्हक् उदगमथलो व थारुन्हके प्रतिनीधित्व फे हुइना व राजनीतिक, कुटनिटिक हिसाबलेफे चट्टुर, सक्कुनसे मिल सेक्ना व नेता कार्यकर्ताहुकनके बीचम फे उहाँ मन्त्रीके रोजाइम पर्लक् हुइटी ।
मन्त्री बनलपाछ आपन जिल्लाकेल निहोख समग्र प्रदेशके बृहत्तर विकासके लाग डटख काम कर्ना चौधरी प्रतिक्रिाय डिहल बाट । ‘पार्टीसे महिन विश्वास कैख सांसद व मन्त्री बनैल बा, उहाँ कलि, यि विश्वासह कबु नि टुट डिहम व मै कबुफे विचलित निहोख पार्टीपर्टी व जनतनके पक्षम निरन्तर डट्खन काम कर्ने बाटु ।’
