छक्का पन्जा कर निसेक्ना आपन कामम विस्वास कर्ना एक परिश्रमी ओ मेहनटि थारु समुदाय हो । थारुनक मुख्य प्यासा खेतिपाति हो । खेतिपातिम साहाबर्खा जाट कर्रा रहट यि माना बोक मुरि भित्रैना समय हो । गोज्झेम डु चार पैसा रह निरह घरभर अनाज पानि भर्ल रह परट कना थारुनक मान्यता हो ।
जस्टक थारु कामम मेहनत कर्ठ पस्ना बहैठ डुक्ख कर्ठ अन्ढारमफे जोन्हेक अज्रार कहअस हरेक कामक पाछ थारुन खुसि पारक लाग एक ना एकठो सस्कार टैटिह्वार झुल्ल बाट बर्खाभर खेति करो हर्डह्वा खाओ बन बन्यास जाओ चुकि रहअस साहाभर खेतिपाति सहेर्क सेक्लसे मनैना पेन्ड्याफे थारुन्हक् खास कैख किसानहुकनके एकठो बराभारी महत्वपूर्ण टिह्वार हो । परिबर्तिट समय आधुनिक जमाना ओ प्रबिधिकके विकासके कारण परम्परागतसे मन्टि अइलक थारुन्हक सस्कार, रिटिअन्सार मन्टि अइलक पेन्ड्या पर्व पाछक समयम हेरैटि जाइटा ।
जब डब्रभर धान पाक्क बाला झपक्क ह्वाए बडिू फट्याए पुरुबसे नाम्सोर पच्छिउँ लागट बर्खा ओराक साहा लागल कना सन्डेस डिह घरघर जर्हन धानक मुठ लिहट ओ धान कट्ना मचामच ह्वाए गाउँ सुनसान खेट्वा चैनार ह्वाए । रङ्गिबिरङ्गि ढुइना सुइला लस्क्या लस्क्या धान ब्वाकट । जब मटावा गुर्वा अघवा बेगारि बलाइट गाउँभरिक मनै एक्क बट्नीम हाहा होहो कटि छाँका पिटि धान काटट् गाउँभरिक मनै एक्क बट्नीम बेगारि करबेरिक छुट्ट रमाइलो रह । आम्हिन उहिम औल्याहिहुइलसे खेट्टोमसे जो छोक्रा हुर्डुंग्या नाच नच्टि आइबेर झन खेट्वासे गाउँ चैनारकेल नाही ओत्रह रमाइलो ह्वाए, डिनभरी कुब्बर बठा बठा धान कट्लक जिउ फे चुम्मर ह्वाजए । केक्रो खेतिपाटि ढेर केक्रो डान्छे केक्रो करुया ढेर केक्रो डान्छे रह । डान्छे रहुया आघ सहेर्क सेक्लसेफे छरछिमेकम सब जाहिनक निओराइट सम स्याकल अस निलग्नाओर्से सखाइक सखा करट । तर, आजकाल यी संस्कार, चालचलन हेरैटी जाइटा । सक्कुन्हक आपन आपन रलसेफे खेन्वा एक्कठो रह खेन्वाभर खह्रिक खह्रि धानकेल, धान काटबोक्क सेक्लसे कट्यार बनाइट अक्खिन काटट् ओ डैंना सुरु करट ।
थारु मनै भिन्सार गोरुलेक डाँय जाइट बैठ्ना बेर्रि बनाइट आगि टप्ना भुजा खैना कौरा सुल्गाइट । ओडूा झार बट्यार ख्याल जाइट ओ खेन्नोम पकापका खाइट । विहानक जन्नी मनै भाटभन्सा कैक बासि डिह आइट आपन आपनकाम टर काम कर्ना ठाउँ एक्क रलसे विना बँट्ल खैलसे खाइलअस निलग्ना ओर्से सब जाहिनक बासि बाँटबाँट खाइट घाना निख्रलसे ग्याँरा रस्याक गोब्रले बेंहर्क थारु बर्ढालेक जाइट ओ जन्नी मनै ओसाए आइट ओ डिनभर गुडिग्याँरा सह्यारट ।
एकठो आहान र्बा एकडिन खेन्नोम धान रस्याक थारु गैल ट एकठो जन्नी ओसाय आइल खेन्नोम रसैलक धान नि ड्याखल यहोर उहोर चिटाइल कहुँनि ड्याखल ढनच्वार गुडिग्याँरा छत्रैटि लैगिलक डगर ड्याखल ट कहलागल “ढन्वा लैगिल लैगिल चोर्वा म्वार मरेन्वाफे लैगिल” यि बात चोर्वाफे सुनल धानसे मजा ट मरेन रैच कैक ओट्ठेसे ढनच्वार ढान च्वार छोर्क मरेनकेल च्वार भिंरल धानफे निमाङ हुइ लागल । जुन घरम डाँके स्याकट आपन घरक गोरुनक सिंघिम पैरक फुला बनाक घलाडेहट जुन घरक गोरु फुला घालट उ घरक ढान डाँक सेक्लकना जनाए अस्टके सक्कु घरक गोरु पालिक पाला फुला लगाइट । धान डाँक सेक्लसे सबजे खेन्नोक बठाहा धान खेन्नोह डिहट आपन चलन अुनसार पेन्ड्या पुजट ।
जब सबजे खेन्नोक बठाहा डिहट बर्का भर्वा उटारल अस हलुक लागिन गाउँक मटाँवा सब गउँलेन पेन्ड्या खाइक लाग ख्याल बलाइट सब घरक गर्ढुरेन जम्माहोक पेन्डेकला सरसामा कर्ना चेलिबेटि इस्टमित्र कुलकविला निउँट बहार कर्ना डिन छुट्याक पेन्डेक ठेकान पारट । चेलिबेटिनफे कैहा बलाए आइट कना पेन्डेक आस रहिन कलसे लर्कापर्का झन हौस्याइल हरट । गल्लीगल्ली पहुँरा लिहल लिहल पहुनि खउएनक लाइन रह । इस्टमित्र चेलिबेटि कुलकबिला छरछिमेक सबजे आपन आपन सुख डुक्ख साँटसाँट हाँसिखुसिसे बाँट पुगखाइ निपुग कहअस एक एक छिम्मर हुइलसेफे सब जाहिन पुगाक पेन्डेक बासि सासिसम पेन्ड्या मनाइट । पेन्ड्या खाक सेक्लसे खर बन्कस काट जैना सरसल्लाहा करट ओ बन बन्यास जैना और काम सुरु ह्वाए । समय परिबर्तनसिल बा । समयक संगसंग प्रबिधिक बिकास हुइटि बा ।
प्रबिधिक प्रयोगले काम लिरौसि हुइटा घारिक गोरु हरजुवा हेरैटि जाइटा । रुप्या पैसा रलक मनैन ट ठिक बा । तर रुप्या पैसा नि रलह मनैन खेटिपाटि कर्ना कर्रा पर्टि जाइटिन । प्रबिधिक प्रयोगले काम उसर्ना समयक बिकासले थारुनक सस्कार ओ वाकर महत््व हेरैटि जाइटा हमार पहिचान बिलैटि जाइटा । आब हम्र हमार पहिचान जोगैना हो पुर्खनके डेखैलक डगर नेङना हो हमार समाज एकजुट कराके सामाजिक एकटा भिट्टरसे खुसि खोजके रमैना हो कलसे प्रबिधिक जत्र ा बिकास ओ प्रयोग हुइलसेफे पेन्ड्याकेल नाहि पुर्खनके सिर्जैलक सक्कु सस्कार मान परल ।
