लखन दहित
पाछक समयम लेंहगाप्रति बहर्लक क्रेजले याकर कारोबार फस्टाइल बा । कैलालीके गौरीगंगा नगरपालिका ८, लिक्मास्थित स्मार्ट ग्रुपके सञ्चालक सदस्य कालुराम चौधरी कठ्, ‘पहिला पहिला व्यवसाय निरह । आब सामाजिक सञ्जाललगायतके प्रचारले व्यवसाय गति लिहल बा ।’
लेंहगा व चोलिया थारू युवतीहुक्र लगैना परम्परागत लोकप्रिय पहिरन हो । पछिल्लो समय फेसनकै रुपम लिहलपाछ याकर कारोबार फस्टैलक हो । मेला, महोत्सव, चाडपर्व उत्सवलगायत सक्कु औपचारिक तथा अनौपचारिक कार्यक्रमम थारू महिलाहुक्र लेंहगा व चोलिया लगैना मन परैठ । फलतः याकर कारोबार चम्कलक् हो ।
स्थानीय ७ जन युवाहुक्र गठन कर्लक स्मार्ट ग्रुपके कारोबारबारे कालुराम कठ्, ‘हम्र ‘स्मार्ट बजार’ नाम डेख फेसबुक पेज चलैल बाटी । जौन पेजसे प्रवद्र्धनके काम कर्ठी । अर्डर आइलपाछ होम डेलिभरी कर्ठी ।’ उ स्मार्ट ग्रुपले पछिल्लो ६ वर्षसे लेंहगा लगायतके कारोबार कर्टि आइल बा ।
मेरमेह्रिक उद्यमी महिलाहुकनस लेंहगा संकलन कैख प्रति लेंहगा ४ हजारसे १५ हजार रुपैयाँसम्म बिक्री हुइना कर्ठा । उ ग्रुपले कञ्चनपुर, कैलाली, बर्दिया, बाँके व दाङ जिल्लासम होम डेलिभरीको काम कर्टि अइलक् कालुराम बटोइठ । पाछक समय विदेशम फे पठैना कर्लक उहाँ बटोइल ।
सो ग्रुपसे व्यावसायिक रुपम लेंहगा संलकन करलग्ल पाछ ग्रुपसे आवद्ध दर्जनौ महिलाहुक्र नियमित रोजगारी पाइल बाट । उहाँके अनुसार एकजन पेशेवर लेंहगा सिना मासिक ५० हजारसे बहुट कमाइ कर्टि आइलबाट कलसे ग्रुपसे बार्षिक ६० लाखके कारोबार कर्टि आइल बा । असिक लेंहगाले रोजीरोटीके प्रमुख आधारसमेत बन पुगल बा ।
उहाँेर कैलालीके घोडाघोडी नगरपालिका २, साँडेपानीके चन्द्रबहादुर चौधरी ५ वर्षठेसे लेंहगाके कारोबार कर्टि आइल बा । उहाँके मुख्य पेशा नै लेंहगा सिना व विक्री विरतण कर्ना हो । आजकाले उहाँके सक्कु परिवार यिह पेशाम लागल बाट ।
कसिख बनैठ लेंहगा ?
लेंहगा कलात्मक फूलबुट्टासे सजिसजाउ रहठ । ‘लेंहगा बनैना फे एक किसिमके कलात्मक सीप तथा हस्तकला नै हो । ‘एक्ठो लेंहगा तयार करबेर विभिन्न खण्डखण्डह ज्वार परठ । लेंहगाके उप्परसे टरसम क्रमशः गुम्टी, नेफा, लेंहगा, पट्टी, कचौटी, गोठ, पट्टी, जिभ्भा, छुट्की गोठ लगायत भागह ज्गारपर्ठा ।’ नम्मा समयसे लेंहगा सिलाइके काम कर्टि अइलक धनगढी उपमहानगरपालिका ८, बुद्ध चौककी सावित्री चौधरी कठ्,ि ‘लेंहगार्ह थप आकर्षक बनाइकलाग सितारा, ऐना, नुरी, फुलरा, मोती, पत्थर लगायत टाँस पर्ठा ।’
डस्यां, डेवारी जसिन चाडपर्व लच्कैटि रहल ब्याला याकर कारोबार ओत्रह बह्रल बा । जौनकारण लेंहगा सिनाहुकन भ्याइ निभ्या बा । धनगढीमा लेंहगा सिटी अइलक दम्पति सीता व विजय चौधरी कठ्,‘सिजन सुरु हुइल बा । लेंहगा, चोलो, बिलाउज सिनाम आजकाल समय बित्ठा । हम्रा आजकाल लौव डिजाइन कैख लेंहगा सिना कर्टि बाटी ।’ पाछक समय थारू समुदायकेल निहोख गैरथारू युवतीहुक्र फे लेंहगाप्रतिके क्रेज बह्रल बा । जौन कारणले फे फेसनके बजारम लेंहगा आपन स्थान वागटल बा । युट्यूवम अइना थारू गीतके मोडेलके कारणले फे लेंहगाके बजार विस्तार हुइलक गायक राजु चौधरी बटोइठ ।
