केन्द्रके डुनु प्यानलम थारु पत्रकार निअटैलसे फे प्रदेश ओ संघम डुनु प्यानलम पहिलासे अखिसके निर्वाचनम थारु पत्रकारहुकनके अर्थपूर्ण सहभागिता बा । प्रदेशम उपाध्यक्ष, महासचिव व जिल्लाकेहकम अधिकाँस जिल्लाम उपाध्यक्ष, सचिव, समावेशी सहसचिव, जनजाति सदस्यके टिकट पाइलबाट । यी उपस्थितिलेफे अर्थपूर्ण सहाभागित मानजैठा । तर यिहम खुशी हुइपर्ना व दुःख हुइपर्ना अवस्था निहाे ।
नेपाल पत्रकार महासंघके आगामी नेतृत्वके लाग देशभर सरगर्मी बह्रल बा । जिल्ला, प्रदेश व केन्द्रम एक्कदिन चनाउ हुइना हुइलक् ओर्से देशभर आब पत्रकारहुकन कर्रा चुनाव लागल बा । जिल्ला, प्रदेश ओ केन्द्रके प्रदाधिकारीहुकनक एक्कफ्यारा छनौट कर्ना प्रावधान बनाइल अनुसार तीन तहम एक्क दिन चुनाउ करैना व्यवस्था कैगिलक् हो ।
यिह व्यवस्था अनुसार यिह चैत २५ गते महासंघके चुनाउ हुइटी बा । केन्द्र, प्रदेश ओ जिल्लाम आ–आपन प्यानल बनाख उम्मेदवारी मनोनयन फे होस्याकल बा । केन्द्रम प्रेस चौतारी नेपाल, मिडिया मञ्च लगायतके गठबन्धन बनाख प्रगतिशील, समावेशी व राष्टूयप्रति प्रतिवद्ध व्यवसायीक पत्रकारके संयुक्त प्यानलसमे निर्मला शर्माके नेतृत्वम ओ प्रेस युनियन, प्रेस संगठन, प्रगतिशील पत्रकार संघ लगायत गठबन्धन बनाख लोकतान्त्रिक, व्यवसायीक, श्रमजिवी पत्रकारके संयुक्त प्यानलमसे विपुल पोख्रेल उम्मेदवारी डेलबाट ओस्टक यिह दुइ प्यानलमसे प्रदेश व जिल्लाम फे उम्मेदवारी मनोनयन कैख आ–आपन प्यानलह जिटाइकलाग पत्रकारहुक्र चुनावी मैदानम उत्रल बाट ।
असिक सरसर्टि ह्यारबेर केन्द्र डुनु प्यानलमसे थारु पत्रकाहर हुकनके उम्मेद्वारी शुन्य बा । यदपी स्वतन्त्रमसे पार्वता चौधरी आदीवासी महिला सदस्यम उम्मेद्वारी डेलबाटी । तर, जौन दुइठो प्यानल बनाख चुनाउम उठल बा उ डुनु प्यानलम थारु पत्रकार नि अट्लक् कारण काहो वाकर गम्भिर समिक्षा करपर्ठा । विधानम प्रस्त रुपम समावेशी, समानुपातिक हिसावले सक्कु जातजातिहुकन समावेश कर्ना हुइटि हुइटि काजे निअटैल त ? याकर समिक्षा थारु पत्रकार संघ नेपालसे करपर्ठा ।
यदपीकेन्द्रके डुनु प्यानलम थारु पत्रकार निअटैलसे फे प्रदेश ओ संघम डुनु प्यानलम पहिलासे अखिसके निर्वाचनम थारु पत्रकारहुकनके अर्थपूर्ण सहभागिता बा । प्रदेशम उपाध्यक्ष, महासचिव व जिल्लाकेहकम अधिकाँस जिल्लाम उपाध्यक्ष, सचिव, समावेशी सहसचिव, जनजाति सदस्यके टिकट पाइलबाट । यी उपस्थितिलेफे अर्थपूर्ण सहाभागित मानजैठा । तर यिहम खुशी हुइपर्ना व दुःख हुइपर्ना अवस्था निहाे । उहओर्से आब जत्रा उपलब्धि हुइल बा उहि कायम करक्लाग जे जौन प्यानलमसे उम्मेदवारी डेल बाट उहाँहुकन जिताइ पर्ना हमार सक्कुजहनके पहिला दायित्व हाे । उहमार थारु उम्मेदवारहुकन जिताइलाग थारु पत्रकार संघ नेपालसे संस्थागत रणनीति बनाख जितैना अभियानम लाग पर्ठा ।
अन्तम उम्मेदवार डेलक सक्कु उम्मेदवारहुकन जितके अग्रिम शुभकामना बा । अइनादिनम जिल्ला ओ प्रदशम जस्ट केन्द्रम फे थारु पत्रकाहुकनके बल्गर सहभागिता बनाइलाग आबहसे जो थारु पत्रकाहुुक्र एकताबद्धहोख जुट पर्ना आवश्यक बा । यी अर्थपूर्ण सहभागिता बनाइलाग आवहसे थारु पत्रकारहुकनके मागह सुनिश्चता कर सेक्लसे नेपाल पत्रकार महासंघम हमार बल्गर सहभागिता रटि अइने बा । व केन्द्र, प्रदेश व जिल्ला जिल्लाम कुशल नेतृत्व चुन पर्ना डेखपर्लक् ओर्से ओसिन नेतृत्व छानकलाग सक्कु थारु पत्रकारहुक्र आपन स्वविवेक प्रयोग कैख मतदान करही कना अपेक्षा सहित सक्कुजहन शुभकामना बा ।
जय गुर्वावा !
